RF Baş Qərargah rəisi Qarabağda vəziyyət barədə

Moskva/24.12.20/Turan: Rusiya sülhməramlıları Dağlıq Qarabağda humanitar fəlakətin qarşısını alıblar. Bu barədə RF SQ Baş Qərargah rəisi Valeri Gerasimov cümə axşamı xarici attaşelər üçün keçirilən brifinqdə bildirib.

"Hazırda Laçın dəhlizinə və Dağlıq Qarabağ ərazisinə Rusiya sülhməramlıları bölmələri tərəfindən tam nəzarət edilir", - V.Gerasimov deyib. O qeyd edib ki, sülhməramlılar humanitar fəlakətin qarşısını almaq və yerli əhalinin müdafiəsi üçün gətirilib, onlar 23 müşahidə postunda atəşin və hərbi əməliyyatların dayandırılmasına dair razılaşmanın reallaşmasını təmin edirlər. Onun sözlərinə görə, artıq 43 mindən çox adam Dağlıq Qarabağa qayıdıb.

"Əhalinin təhlükəsiz həyat fəaliyyətini təmin etmək üçün ərazilərin və yolların partlayıcı əşyalardan təmizlənməsi işləri aparılır. Hazırda 280 ha-dan çox ərazi və 100 kilometrdən artıq yol təmizlənib. 9 minə yaxın partlayıcı əşya aşkar edilərək zərərsizləşdirilib", - V.Gerasimov bildirib.

"Sülhyaratma əməliyyatına rəhbərlik üçün vəziyyətin dəyişməsinə operativ reaksiya verməyə imkan yaradan idarəetmə sistemi yaradılıb", - o vurğulayıb.

V.Gerasimov əlavə edib ki, Baş Qərargah tərəfindən Azərbaycan və Ermənistanın hərbi idarələri ilə qarşılıqlı fəaliyyət təşkil edilib və birbaşa əlaqə kanalları quraşdırılıb. -02D-