RF XİN Bakının tənqidlərini qəbul etmir

Moskva18.01.19/Turan: Yanvarın 18-də RF XİN milliyyətcə erməni olan Rusiya vətəndaşlarının Azərbaycana buraxılmaması ilə bağlı Azərbaycan XİN-in bəyanatına cavab verib. "Erməni əsilli Rusiya vətəndaşlarının Azərbaycana buraxılmaması barədə bizim məlumatlara Azərbaycan XİN mətbuat xidmətinin reaksiyası ilə tanış olduq. Şərhin tonunun diplomatik qaydalardan kənara çıxdığını qeyd edirik. İkitərəfli münasibətlərin dinamik ardıcıl inkişafı fonunda sanki az əhəmiyyətli olan Azərbaycana səfər edən rusiyalı vətəndaşların diskriminasiyaya məruz qalması mövzusunun "şişirdilməsinə" gətirib çıxaran məzmun da az təəccüb doğurmur.

Belə yanaşma qəbuledilməzdir. Rusiya vətəndaşlarının qanuni hüquqlarının və maraqlarının müdafiəsi Rusiya Federasiyası prezidentinin rəhbərliyi ilə həyata keçirilən xarici siyasətimizin prioritetlərindən biridir. Bu və ya digər ölkə ilə dost, dövlətlərarası münasibətlərin olmasına bu sahədə problemin konstruktiv həllinə xidmət edən amil kimi baxılır.

İşə birbaşa aid olmayam ümumi mülahizələrin əvəzinə Azərbaycan XİN-in "fərdi məsələ" adlandırdığı rusiyalılarla baş verən hər insident üzrə predmetli açıqlama eşitməyi istərdik.

Bunların arasında 2018-ci ilin mayında Böyük Vətən Müharibəsi veteranı, səksən yaşlı Leninqarad sakininin gəlişindən imtina edilməsi və ya 2017-ci ilin fevralında dörd yaşlı oğlu ilə gələn qadının bir neçə saat saxlanması da var.

Həmçinin Rusiya vətəndaşlarının Azərbaycana səfərlərinin respublikanın Moskvadakı səfirliyi ilə razılaşdırılmasının vacibliyi barədə Azərbaycan tərəfinin eyhamı ilə bağlı diplomatik kanalların rəsmi açıqlamasını istəyirik. Bu, Rusiya Federasiyası və Azərbaycan Resbpublikası vətəndaşlarının vizasız səfərləri haqqında 3 iyul 1997-ci il tarixli sazişin pozulması olardı.

Azərbaycan tərəfinin məzmunlu reaksiyasından asılı olaraq gələcək addımlarımızı müəyyən edəcəyik", - cavabda deyilir.

Xatırladaq ki, yanvarın 16-də Azərbaycan XİN erməni soyadlı rusiyalıların Azərbaycana buraxılmaması barədə RF XİN nümayəndəsi Mariya Zaxarovanın 11 yanvar tarixli bəyanatını tənqid edib.

"Bu ilk dəfə deyil ki, RF XİN mətbuat katibi ikitərəfli strateji münasibətlərin ruhuna zidd olan bəyanatlarla çıxış edir. Azərbaycan-Rusiya əlaqələrinin inkişafı fonunda sözügedən bəyanat və hansısa fərdi məsələnin ümumi kontekstdən çıxarılaraq şişirdilməsi cəhdləri qeyd etdiyimiz ümumu tendensiyanın növbəti təzahürüdür", - Azərbaycan tərəfinin cavabında bildirlib.

RF XİN mətbuat katibi bəyan edib ki, "Azərbaycan tərəfi söz verib ki, bu vəziyyəti düzəldəcək"

"Biz bunu qətiyyətlə təkzib edirik. Azərbaycan-Rusiya münasibətləri bərabərhüquqlu əlaqələrdir və "vəziyyəti düzəldəcəklər" ifadəsi ikitərəfli münasibətlərin mahiyyətinə ziddir".

"Azərbaycan XİN əmindir ki, Rusiya XİN-in mətbuat katibinin növbəti təxribat xarakterli və anti-Azərbaycan bəyanatı Azərbaycan-Rusiya əlaqələrinə mənfi təsir göstərməyəcək", - Azərbaycan XİN-in cavabında deyilir.-02D-