Rusiya Yerevanı gah təhdid edir, gah xəbərdarlıq edir, gah da məsləhət verir

Bakı/15.12.23/Turan: Cümə axşamı Rusiya Xarici İşlər Nazirliyi onu Ermənistan-Azərbaycan nizamlanması prosesindən kənarlaşdırmaq cəhdlərindən narazılığını bir daha ifadə edib. Xarici İşlər Nazirliyinin rəsmi nümayəndəsi Mariya Zaxarova geniş şərhlə çıxış edərək Ermənistan hakimiyyətini Rusiyanın rolunu gözdən salmaq cəhdində ittiham edib.

Şərhdə nizamlanma məsələsində Rusiyanın rolunun "alternativsizliyindən" danışılır. Rusiya, Azərbaycan və Ermənistan liderlərinin 9 noyabr 2020-ci il, 11 yanvar və 26 noyabr 2021-ci il, 31 oktyabr 2022-ci il tarixli bəyanatlarından ibarət üçtərəfli razılaşmalar kompleksi Bakı və Yerevanın barışması üçün alternativsiz "yol xəritəsi"dir.

"Bu vacib sənədləri rədd etmək cəhdlərini olduqca təhlükəli hesab edirik. Belə addım qaçılmaz olaraq, ilk növbədə Ermənistanın özü üçün ciddi risklərə səbəb olacaq".

«Rusiyadan fərqli olaraq, ABŞ və Avropa İttifaqı Ermənistana və Cənubi Qafqazın digər dövlətlərinə sülh və sabitlik gətirməyə çalışmırlar, onların vəzifəsi tamamilə başqadır – bizi və digər regional oyunçuları sıxışdırmaq, Balkanlar, Yaxın Şərq və Ukraynadan sonra yeni gərginlik ocağı yaratmaq".

"Biz Yerevanın bir sıra hərəkətlərini qeyd etməyə bilmərik, onlar səbəbindən üçtərəfli razılaşmaları tam həyata keçirmək mümkün olmayıb.

2022- ci ilin oktyabrında Praqada keçirilən Avropa İttifaqının himayəsi altında keçirilən sammitdə Ermənistan tərəfi Qarabağla bağlı mövqeyini 180 dərəcə dəyişib, onun Azərbaycana məxsus olduğunu etiraf edib və eyni zamanda, - Avropa İttifaqından olan məsləhətçilərin fikirlərini- heç olmasa, bu regionun erməni əhalisinin hüquq və təhlükəsizliyinin lazımi şəkildə təmin edilməsinin vacibliyini qeyd etməyi -  “unudub”.  Bu qərar Rusiya sülhməramlı kontingentinin yerləşmə zonasında vəziyyəti kökündən dəyişdirib".

"Ermənistan tərəfinin üçtərəfli razılaşmaları pozaraq Qarabağa silah daşımaq üçün Laçın dəhlizindən istifadə etməsi və Yerevanın erməni silahlı birləşmələrin regiondan tam çıxarılmasını təmin etməyə hazır olmaması da mənfi təsir göstərib ki, bu da bu ilin sentyabrında silahlı toqquşmalara səbəb olub".

"Nəqliyyat kommunikasiyalarının açılması məsələsində məhz Yerevan baş nazir müavinlərinin həmsədrliyi altında üçtərəfli işçi qrupunun xəttilə konkret razılaşmaların əldə edilməsini dəfələrlə "dondurub".  Əsasən, artıq bir neçə aydır ki, erməni tərəfi bəyanatın 9 noyabr 2020-ci il tarixli yüksək səviyyəli bəyanatın  9-cu bəndinin müddəalarına əməl etməkdən imtina edərək Azərbaycanla Ermənistan arasında dəmir yolu əlaqəsinin bərpası üzrə işlərin başlanmasını əngəlləyir".

Rusiyanın köməyilə iki ölkə arasında sərhədin delimitasiyası üzrə real iş hələ başlamayıb. Erməni tərəfi Avropa İttifaqı missiyasının dəvəti naminə sərhəd zonalarında vəziyyətin sabitləşdirilməsilə bağlı Kollektiv Təhlükəsizlik Müqaviləsi Təşkilatının mexanizmlərindən imtina edib.

Ermənistan, Azərbaycan və Rusiya rəhbərliyinin qeyd olunan qərarlarının icrasının ləngiməsi “Yerevanın hərəkətlərinin qeyri-ardıcıllığının birbaşa nəticəsidir,  bəzilərinin iddia etdiyi kimi, Moskvanın siyasəti deyil".

Bu çətin vəziyyətdən çıxış yolu aydındır – üçtərəfli razılaşmaların icrasına qayıtmaq.

"Ermənistan və Azərbaycan arasında sülh müqaviləsi üzrə danışıqların növbəti raundunu ən yaxın vaxtlarda Rusiyada təşkil etmək təklifimizi təsdiqləyirik", - şərhdə deyilir. -0-