Seçkiqabağı təşviqat üçün pulsuz efir vaxtı 3 saatdan az ola bilməz, YAP bundan yararlanacaqmı?

Seçkiqabağı təşviqat üçün ayrılan efir vaxtının ümumi həcmi 3 saatdan az ola bilməz.

Bunu Audiovizual Şuranın rəhbəri İsmət Səttarov bu gün növbədənkənar parlament seçkilərində seçkiqabağı təşviqat imkanları və təşviqat kampaniyasının KİV-də işıqlandırılmasının əsasları məsələlərinə həsr olunan iclasda deyib.

Onun sözlərinə görə, parlament seçkiləri zamanı pulsuz efir vaxtı bərabər əsaslarla bölüşdürülməlidir.

Qeyd edək ki, Seçki Məcəlləsinə əsasən, seçkiqabağı təşviqat üçün pulsuz efir vaxtı hüququ 125 seçki dairəsinin 60-dan çoxunda namizədi qeydə alınmış partiyalara verilir.

İndiki seçkilərdə bu meyara yalnız bütün dairələr üzrə namizədləri qeydə alınan hakim Yeni Azərbaycan Partiyası (YAP) cavab verir.

Əvvəlki növbədənkənar parlament seçkilərində YAP bütün siyasi qüvvələrə “bərabər imkanlar” yaratmaq üçün bu üstünlükdən “səxavətlə” imtina etdi.

YAP ödənişsiz efir vaxtından istifadə ilə bağlı hələlik qərarını açıqlamayıb.

Müstəqil ekspertlər bunu hakimiyyətin seçkiləri ictimai marağın mümkün qədər aşağı olduğu şəraitdə keçirmək niyyəti kimi qiymətləndiriblər.