Serbiya prezidenti Ermənistana silah tədarükü ilə bağlı Əliyevə açıqlama verib

Bakı/07.08.20/Turan: Serbiya prezidenti Aleksandr Vuçiç bu gün Azərbaycan dövlət başçısı İlham Əliyevə zəng edib.

Vuçik Azərbaycan sərhədində Ermənistanın təxribatı nəticəsində baş vermiş hadisələr zamanı Azərbaycan hərbiçilərinin həlak olması ilə əlaqədar başsağlığı verib, bu barədə Azərbaycan prezidentinin mətbuat xidmətinin məlumatında deyilir.

Eyni zamanda, Serbiya prezidenti bu hərbi toqquşmalarda Ermənistan tərəfinin Serbiyada istehsal olunan silahlardan istifadə etməsindən təəssüf hissi keçirdiyini bildirib. O, bu vəziyyətin araşdırılması ilə bağlı yaxın vaxtlarda Azərbaycana Serbiyanın yüksək səviyyəli nümayəndə heyətinin göndəriləcəyini qeyd edib.

Vuçiç Azərbaycanla strateji tərəfdaşlığa əsaslanan dostluq münasibətlərini yüksək qiymətləndirdiyini vurğulayaraq bunun təsdiqi kimi, Azərbaycan prezidentini Serbiyaya rəsmi səfərə dəvət edib.

Telefon zənginə görə minnətdarlığını bildirən Əliyev qeyd edib ki, Ermənistan tərəfinin Azərbaycanın hərbi və mülki mövqelərini atəşə tutması zamanı Serbiya istehsalı olan hərbi sursatlardan istifadə etməsi faktı Azərbaycan cəmiyyəti tərəfindən narahatlıqla qəbul edilib.

Əliyev Serbiya prezidentinin yuxarıda göstərilən faktın araşdırılması və əməkdaşlığın perspektivlərinin müzakirə edilməsi üçün yüksək səviyyəli nümayəndə heyətinin göndərilməsi barədə qərarı ilə bağlı məmnunluğunu ifadə edib.

Telefon söhbəti zamanı tərəflər gələcəkdə iki ölkə arasında dostluq əlaqələrinə kölgə sala biləcək hərəkətlərə yol verilməməsi barədə qərara gəliblər. İlham Əliyev Serbiyaya səfərilə əlaqədar dəvətə görə minnətdarlığını bildirib.

Xatırladaq ki, 12-14 iyul tarixlərində Tovuz istiqamətində gedən döyüşlər zamanı Ermənistan tərəfi Serbiya istehsalı olan minaatanlardan və mərmilərdən istifadə edib. Rəsmi Bakı Belqraddan izahat tələb edib. -06-