Sosial şəbəkələrdə karantin dövründə keçirilən toy mərasimi ilə bağlı qalmaqallı video yayılıb.

Bakı/21.08.20/Turan: Avqustun 21-də sosial şəbəkələrdə karantin dövründə keçirilən toy və ad günü mərasimlərindən bir neçə video yayılıb.

Videolardan biri Prezident Administrasiyasının keçmiş rəhbəri Ramiz Mehdiyevin nəvəsinin Novxanı qəsəbəsindəki villasında keçirilən toyuna aiddir.

Videogörüntüdə Ramiz Mehdiyev özü və bir sıra dövlət məmurları, o cümlədən hakim partiyanın icraçı katibinin müavini Siyavuş Novruzov və onun həyat yoldaşı, ombudsman Səbinə Əliyeva da əks olunub.

Videogörüntüdə Bakı Dövlət Universitetinin sabiq rektoru Abel Məhərrəmov Ramiz Mehdiyevin şərəfinə “tost” deyir, onu “dahi dövlət xadimi” adlandırır, onun sayəsində Azərbaycanın “bir çox uğurlar əldə etdiyini” qeyd edir.

Qızğın müzakirələrdən sonra DİN bu videogörüntülərin yayılması ilə bağlı yoxlama apardığını və onlar təsdiq edilərsə, karantini pozanların cəzalandırılacağını bildirmək məcburiyyətində qalıb. -16D-