Talış tədqiqatçısı İqbal Əbilov saxlanılıb

Belarusdan Azərbaycana məzuniyyətə gələn Azərbaycan vətəndaşı, etnik talış İqbal Əbilov iyulun 22-də Masallı rayonunun Bala Kolatan kəndində Dövlət Təhlükəsizliyi Xidmətinin əməkdaşları tərəfindən saxlanılıb.

Əbilovun yaxınlarının verdiyi məlumata görə, o, uşaqlıqdan Belarusda yaşayır və iyunun 14-də qohumunun toyunda iştirak etmək üçün Azərbaycana gəlib.

İyunun 22-də Əbilov DTX-nin Masallı rayon şöbəsinə çağırılıb və 6 saat ərzində dindirilib. 

İyunun 27-də Bakıdan Moskvaya gedərkən o, təyyarəyə buraxılmayıb, pasportu və telefonu əlindən alınıb.

İyulun 22-də Əbilov pasportunun və telefonunun qaytarılması bəhanəsi ilə DTX-nin Masallı rayon şöbəsinə çağırılıb. Lakin valideynlərinə məlumat vermədən Bakıya aparılıb. 

Ombudsmana müraciətdən sonra valideynlərinə bildiriblər ki, Əbilov Azərbaycan CM-in 283-cü (milli ədavət salma) və 274-cü (dövlətə xəyanət) maddələri ilə şübhəli bilinir.

Bu gün o, qətimkan tədbirinin seçilməsi üçün Səbail Rayon Məhkəməsinə çıxarılacaq.

Yaxınları hesab edirlər ki, Əbilov uydurma ittihamla saxlanılıb, onun təqib olunmasının əsl səbəbi müxtəlif milli azlıqlar, o cümlədən Azərbaycan talışları haqqında araşdırmalar aparmasıdır. 

Azərbaycan vətəndaşı olan Əbilov həmçinin Belarusda yaşamaq icazəsinə malikdir. 

Əbilov Riqada qeydiyyatdan keçmiş "Talış Milli Akademiyası"nın təsisçilərindən biri, həmçinin bu qurumun mətbu orqanı olan "Talış Milli Akademiyası Xəbərləri"nin baş redaktorudur. Bu nəşr Rusiya-Ermənistan Strateji və İctimai Təşəbbüslərə Dəstək Mərkəzinin russia-armenia.info saytında da dərc olunurdu.