Talış tədqiqatçısı İqbal Əbilov 4 ay müddətinə həbs edilib

İyulun 24-ü axşam saatlarında Səbail Rayon Məhkəməsi talış tədqiqatçısı İqbal Əbilov barəsində 4 ay müddətinə həbs qətimkan tədbiri seçilib.  

O, Azərbaycan Cinayət Məcəlləsinin 283 (milli ədavətin qızışdırılması) və 274 (dövlətə xəyanət) maddələri ilə ittiham olunur.

Bu barədə Turan-a tədqiqatçının atası Şahin Əbilov məlumat verib.

Onun sözlərinə görə, İ.Əbilov ona qarşı irəli sürülən ittihamları qəbul etmir, çünki bu  cinayətləri törətməyib.

Ş.Əbilov oğlunun uşaqlıqdan Belarusda yaşadığını deyib.

“Oğlum siyasətlə məşğul olmayıb. O, geniş elmi araşdırmalar aparıb. Onun tədqiqatları, təkcə talışlarla bağlı deyil, Çindən Türkiyəyə qədər bütün geniş regiona aid olub”.

O qeyd edib ki, həbs qərarından apellyasiya şikayəti veriləcək.

Talış fəalları hesab edirlər ki, İ.Əbilov qondarma ittihamlarla həbs edilib, onun təqib edilməsinin əsl səbəbi müxtəlif milli azlıqlar, o cümlədən Azərbaycan talışları ilə bağlı araşdırmalardır.

Belarusdan Azərbaycana məzuniyyətə gələn Azərbaycan vətəndaşı, etnik talış İqbal Əbilov iyulun 22-də Masallı rayonunun Bala Kolatan kəndində Dövlət Təhlükəsizliyi Xidmətinin əməkdaşları tərəfindən saxlanılıb.

35 yaşlı  İqbal Əbilov virtual “Talış Milli Akademiyası”nın mətbu orqanı olan “Talış Milli Akademiyasının Xəbərləri”nin baş redaktorudur.