Tədbir iştirakçıları Azərbaycan XİN-i bəyanat verməyə çağırıblar

Bu günlərdə Müsavat Partiyasının ofisində keçirilən “Ukrayna inqilabı və onun postsovet məkanına təsiri” adlı tədbirin iştirakçıları Azərbaycan XİN-i bu hadisələrə  konkret mövqe bildirməyə çağıran bəyanat qəbul edib.
Bəyanatda Azərbaycanın ictimai-siyasi dairələrinin Rusiyanın Ukraynanı  parçalamaq cəhdlərini qanunsuz və beynəlxalq hüquqa zidd sayaraq qətiyyətlə pislədiyi vurğulanır. Azərbaycanın strateji tərəfdaşı olan  Ukraynanın tərkib hissəsi Krımda separatçılığın baş qaldırmasının narahatlıq doğurduğu qeyd edilir. Separatizm və xarici təcavüzün Azərbaycan üçün həssas mövzu olduğunu bildirən müəlliflər Azərbaycanın bu ağır gündə Ukraynaya dəstək ifadə etməli olduğunu mənəvi və müttəfiqlik borcu kimi dəyərləndirir.
Müəlliflərə görə, Azərbaycan XİN-in mövcud həssas məqamda Ukraynanın ərazi bütövlüyünü dəstəkləyən, separatçılıq və xarici müdaxiləni  pisləyən bəyanat verməsinə ehtiyac var. Sənəddə deyilir ki, Ukraynanın yeni hakimiyyəti, siyasi dairələri və ictimaiyyəti tərəfdaşlarından, GUAM üzvləri,  o cümlədən, Azərbaycandan ən azı belə bir dəstək gözləyir.-05D-