Tehranın Bakıya münasibətdə kökə və qamçı prinsipindən istifadə etmək cəhdi

Bakı/01.10.21/Turan: İran rejiminin Əliyevin Türkiyənin “Anadolu” agentliyinə müsahibəsinə əsəbi reaksiyası davam edir. Görünür, Tehran əzələlərini nümayiş etdirmək qərarına gəlib, Azərbaycanı qorxutmaq və mövqeyini yumşaltmağa vadar etmək üçün onun sərhədləri yaxınlığında genişmiqyaslı təlimlərə başlayıb.

Eyni zamanda İranın rəsmi və qeyri-rəsmi nümayəndələri Azərbaycanın ünvanına ittihamlar səsləndiriblər. Maraqlıdır ki, bütün bu bəyanatlar iki tezisi təkrarlayır: regionda sərhədlərin dəyişməsi və bizim sərhədlərimizdə İsrail rejiminin güclənməsi yolverilməzdir. İran hərbiçiləri, həmçinin XİN başçısı bunu təkrar edir. Nisbətən kiçik fiqurlar isə daha açıq danışır, daha doğrusu, İranın Azərbaycanın zorla Zəngəzura irəliləməsinə imkan verməyəcəyini deyir.

Belə olan halda suallar yaranır: İran 30 ildir regionda sərhədlərin Ermənistan tərəfindən zorla dəyişdirilməsinə niyə yol verirdi?

İran Azərbaycanın Zəngəzur dəhlizini zorla açmasından qorxursa, bu, o deməkdir ki, Tehran Ermənistanın sərhədlərinin zamini kimi çıxış edir?

İsrail mövzusuna gəlincə, İranın rəsmi və qeyri-rəsmi şəxslərindən heç kim “İsrailin İran sərhədlərində iştirakının güclənməsi” dedikdə nə nəzərdə tutulduğunu izah etməyib.

Tehranın bütün bu əsəbi hərəkətlərinin arxasında Azərbaycanın Qarabağ müharibəsindəki qələbəsi dayanır. Bu, İranı regiona təsirindən məhrum edib. Türkiyə güclənib və Azərbaycanda mövqeyini gücləndirib, Tehranın erməniyönlü siyasəti geosiyasi məğlubiyyətini həzm edə bilməyən İranın gerçək üzünü növbəti dəfə göstərib.

Bakının dəfələrlə xahiş və xəbərdarlıq etməsinə baxmayaraq Qarabağa gedən İran yük maşınları ilə bağlı qalmaqal İranın qardaşlıq haqqında bəyanatlarının bir qara qəpiyə belə dəymədiyini göstərir. Yeri gəlmişkən, İrandan heç kim Bakının bu iradlarına cavab verməyib və erməni separatçılara yanacaq, inşaat materialı və işçi qüvvə göndərilməsinin Azərbaycanla qardaşlıq haqqında bəyanatlarla necə uzlaşdığı barədə suala cavab verməyib.

Tehranda, yəqin ki, hamı vəziyyəti gərginləşdirməyə davam edəcək qədər reallıqdan uzaq deyil. Belə ki, İranın daxili işlər naziri Əhməd Vahidi dünən İranın yeni hökumətinin Azərbaycan da daxil olmaqla, qonşularla dostluq münasibətlərini möhkəmləndirmək siyasətini davam etdirəcəyi barədə sakitləşdirici bəyanatla çıxış edib.

“Azərbaycanla bağlı hansısa məsələlər və anlaşılmazlıqlar varsa, bütün bu məsələlər diplomatik yolla həll ediləcək”, deyə o bildirib.

Bütün bu vəziyyətdə hadisələrə adekvat reaksiya verə bilməyən yeni İran hökumətinin uğursuzluğu da sezilir. -02B-