Turan agentliyi Ağ Ev müxbirlərinin axşam yeməyində iştirak edib

Vaşinqton /01.05.23/Turan: Ağ Ev müxbirlərinin illik axşam yeməyi Vaşinqtonun jurnalist cameəsındə ən mühüm hadisə sayılır və aparıcı mətbuat işçilərinin Ağ Ev administrasiyasının üzvləri və aparıcı siyasətçilərlə şəxsən ünsiyyət qurduğu gecə kimi tanınır.

Həmin gün tanınmış şəxslər və media elitası həftə sonu şam yeməyi zamanı eksklüziv görüşlər, rahat ünsiyyət, özünütənqid və Vaşinqton stilində yumor üçün ABŞ-ın paytaxtına toplaşırlar.

İlk dəfə Turan agentliyinin timsalında Azərbaycan mediası Ağ Ev Müxbirlər Assosiasiyasının (WHCA) təşkilatçılığı ilə keçirilən bu tədbirin iştirakçıları arasında olub.

Turan-ın Vaşinqton müxbiri, WHCA üzvü və ABŞ-da xarici mətbuat müxbirlərinin Assosiasiyası İdarə Heyətinin üzvü Aleks Raufoğlu şənbə günü 2000 jurnalist, siyasətçi və tanınmış şəxslər arasında bu mərasimə dəvət olunub.

Prezident Co Bayden, birinci xanım Jill Bayden, vitse-prezident Kamala Harris və digərləri «The Daily Show»nun müxbiri, əsas aparıcı olan komediyaçı Roy Vud (kiçik) ilə birlikdə səhnədə oturublar.

Mərasimə gəlmədən öncə prezident Co Bayden və birinci xanım Jill Bayden mart ayından Rusiyada həbsdə olan jurnalist Evan Gerşkoviçin valideynlərilə görüşdə iştirak ediblər.

"Bu gün mesajımız belədir: jurnalistika cinayət deyil", - Bayden öz  çıxışında deyib. "Azad mətbuat azad cəmiyyətin dayağıdır, düşmən deyil".

Prezident ilk 5 dəqiqəni xaricdə saxlanılan amerikalılara həsr edib. "Sizə söz verirəm ki, onları evə qaytarmaq üçün var gücümlə çalışacam”, - o deyib.

Sonra o, öz yaşı ilə bağlı zarafat edərək deyib ki, ABŞ Konstitusiyasına edilən 1-ci düzəliş (mətbuat və söz azadlığını nəzərdə tutur) onun xoşuna gəlir, "çünki onu dostu Jimmy Medison (çoxdan vəfat edib – red.) yazıb”.

"Məni yaşlı adlandırırsınız?"Mən buna qətiyyətlilik deyirəm. Siz deyirsiniz: “Mən köhnəyəm", mən deyirəm ki,  müdrikəm”, - Bayden zarafata davam edib.

Baydendən sonra səhnəyə çıxan komediyaçı Roy Vud da prezidentin yaşına toxunaraq deyib ki, "Fransadakı hadisələr bizi ruhlandırmalıdır. Onlar pensiya yaşını iki il 64 yaşına qədər artıranda iğtişaşlar təşkil etdilər".

"Bu arada Amerikada 80 yaşlı bir adamımız var ki, bizə daha dörd il iş üçün yalvarır", - Vud gülərək sözlərinə davam edib.

* "Müxbirlərin şam yeməyi" adlı tədbir 1914-cü ildə administrasiyanın işini işıqlandıran, Ağ Evin brifinq zalına və prezidentə çıxışı olan jurnalistlər tərəfindən təsis edilib. İlk şam yeməyi 1920-ci ildə baş tutub, 1924-cü ildə prezident Kalvin Kulic belə  axşam yeməyində iştirak edən ilk aktiv rəhbər olub. -0-