Türkiyə və Azərbaycan orduları istənilən vəzifəni həll etməyə hazırdır

Ankara/11.02.21/Turan: Türkiyənin milli müdafiə naziri Hulusi Akar cümə axşamı Qars əyalətində Türkiyə-Azərbaycan təlimlərinin iştirakçıları qarşısında çıxış edərkən Türkiyə və Azərbaycan ordularının döyüş hazırlığına yüksək qiymət verib.

Akarın sözlərinə görə, “Qış-2021” təlimləri zamanı Türkiyə və Azərbaycan SQ istənilən hava şəraitində və coğrafi şəraitdə qarşıya qoyulmuş vəzifələrin yerinə yetirilməsinə yüksək səviyyədə hazırlıq nümayiş etdiriblər. İki qardaş ölkənin orduları peşəkarlığı və qabaqcıl texnologiya ilə təchizatı ilə fərqlənir, deyə Türkiyəli nazir bildirib.

O qeyd edib ki, Türkiyə müasir dövrün daim dəyişən istənilən təhdid və çağırışlarına hazır olmalıdır. Misal kimi Hulusi Akar qonşu Suriyadakı vəziyyətə diqqət çəkib.

“Ankara Suriyanın şimalında terrorçuların nəzarəti altında olan zona yaradılması planının həyata keçirilməsinə imkan vermədi. Biz öz cənub sərhədimizdəki bu “terror dəhlizini” dağıtdıq və gələcəkdə də bu cür planların həyata keçirilməsinə imkan verməyəcəyik. Bütün tərəflər bunu dərk etməlidir”, deyə Anadolu agentliyi Akardan sitat gətirir.

Türkiyənin müdafiə naziri daha sonra Yunanıstanla münasibətlərdə gərginliyə diqqət çəkib, Afinanı regionda münaqişədən çəkinməyə çağırıb. “Yunanıstan gərginliyin artmasından çəkinməli, təhdid dilindən əl çəkməli və başa düşməlidir ki, bu metodlar heç nəyə gətirib çıxarmayacaq”, deyə nazir bildirib.

Akar qeyd edib ki, Türkiyə dünya ictimaiyyətindən Kipr, Ege dənizi və ya Aralıq dənizindəki vəziyyətə obyektiv və rasional yanaşma gözləyir.

Xatırladaq ki, təlimləri Azərbaycanın müdafiə naziri Zakir Həsənov da müşahidə edir. Təlimlər fevralın 1-də başlayıb və 10 gündür davam edir. -02D-