"Türkiyənin Azərbaycanda artan nüfuzu İrana əlavə narahatlıq yaradıb", - politoloq

Bakı/29.09.21/Turan: 44 günlük İkinci Qarabağ müharibəsindən sonra Türkiyənin Azərbaycanda artan nüfuzu İrana əlavə narahatlıq yaradıb. Bunu politoloq Azər Rəşidoğlu Turan-a açıqlamasında son vaxtlar İran-Azərbaycan münasibətlərində yaranan müəyyən gərginliklə bağlı məsələni şərh edərkən deyib.

O qeyd edib ki, İran-Azərbaycan münasibətləri, demək olar ki, həmişə gərginliklə müşaiyət edilib. “Cənubi Azərbaycan amili”, rəsmi Bakının İsrail və Qərblə isti münasibəti, Xəzər dənizində Qərb şirkətlərinin çalışması İranı narahat edir, deyə Azər Rəşidoğlu qeyd edib.

Politoloqa görə, Tehranın Qarabağ savaşındakı qərəzli mövqeyi, İranın bəzi  ruhanilərinin Azərbaycan haqqında təhqiramiz bəyanatları Azərbaycanda antiirançılığı gücləndirib.

İranın daxilində olan vəziyyətə gəlincə, Azər Rəşidoğlu qeyd edib ki, İran hakimiyyətində mövcud olan Vilayəti Fəqih İnstitutu (hazırda bu institutun başında əslən azərbaycanlı olan Xamneyi durur – red.) güclüdür, odur ki, onun nümayəndəsinə qarşı çıxmaq da o qədər asan deyil.

“İranda rejim, bütün təzadlarına baxmayaraq, hələ ki, güclüdür. Əgər İranda rejim devrilərsə, milli və dini zəmində başlayacaq savaş bölgəni, o cümlədən Azərbaycanı öz ağuşuna ala bilər”, deyə politoloq bildirib.

Onun sözlərinə görə, İranda hazırda mühafizəkar qüvvələr kifayət qədər güclüdür və istənilən etirazları yatıra bilirlər.  

Politoloq ehtimal edib ki, İran-Azərbaycan münasibətləri bundan sonra da gərgin, lakin dəyişkən olaraq qalacaq.

İranla Azərbaycan arasında son gərginliyə səbəb İran yük avtomobillərinin Azərbaycanı xəbərdar etmədən Qarabağa yük daşımaları ilə bağlıdır. Buna cavab olaraq Azərbaycan İran sürücülərindən ölkə ərazisinə daxil olduqları üçün gömrük rüsumu almağa və daşınan yükü yoxlamağa başlayıb. Bu fonda İran Azərbaycanın 44 günlük müharibə nəticəsində bərpa etdiyi sərhədlərin yaxınlığında hərbi təlimlər keçirdi. Prezident İlham Əliyev Türkiyənin “Anadolu” agentliyinə müsahibəsində hərbi təlimlərin keçirilməsi ilə bağlı təəccübünü bildirib və qeyd edib ki, 30 il işğal müddətində İran həmin ərazilərdə təlim keçirməyib. -05D-