Ukrayna üzrə Səudiyyə sammiti “məhsuldar” oldu - Dövlət Departamenti

Vaşinqton/08.08.23/Turan: ABŞ Ciddədə Ukrayna üzrə keçirilən sammitin nəticələrini “məhsuldar" hesab edir, deyə TURANın Vaşinqton müxbiri xəbər verir.

“Biz bir sıra ölkələrin Rusiyanın ukraynalılara və onların ölkələrinə qarşı zorakılığı, Kiyevin ərazi bütövlüyü və suverenliyi nəzərə alınmaqla ədalətli və davamlı sülhə baxışı haqqında məlumatı birbaşa Ukraynadan eşitməsini səmərəli hesab edirik”, - deyə Dövlət Departamentinin mətbuat katibi Metyu Miller brifinqdə Səudiyyə Ərəbistanında keçirilən sammitin nəticələri ilə bağlı TURANın suallarını cavablandırarkən bildirib.

Sammit iştirakçıları arasında ABŞ-ın milli təhlükəsizlik üzrə müşaviri Ceyk Sallivan və dövlət katibinin müavini Viktoriya Nuland da olub. Sammitdə Səudiyyə Ərəbistanından başqa, Ukrayna, Almaniya və Türkiyə də daxil olmaqla 40 ölkənin nümayəndələri iştirak edib.

Sammit zamanı Nuland və Sullivan Çinin xüsusi nümayəndəsi və Rusiyadakı keçmiş səfiri Li Xue ilə ayrıca görüş keçiriblər.

TURAN həmçinin Millerdən keçən həftə təhlükəsizlik təminatları üzrə keçirilən ABŞ-Ukrayna dialoqunun nəticələri ilə bağlı sual verib.

Millerin sözlərinə görə, Ukraynanın uzunmüddətli təhlükəsizliyinin təmin edilməsi Vaşinqtonun “prioriteti”dir. - Söhbətin predmeti elə bu idi.

Dövlət katibi Entoni Blinken bazar ertəsi ukraynalı həmkarı Dmitri Kuleba ilə telefonla danışıb, Ciddə danışıqlarının nəticəsini və “uzunmüddətli təhlükəsizlik tədbirləri”ni müzakirə edib.

“Dövlət katibi ABŞ-ın Ukraynanın Rusiya təcavüzünə qarşı müdafiəsinə sarsılmaz və davamlı dəstəyini bir daha təsdiqlədi və Ukrayna silahlı qüvvələrinə daimi köməyini bir daha təsdiq etdi”, - deyə Miller əlavə edib. 0