Ukraynanın uğuru təkcə ruslar üçün gözlənilməz oldu - Pentaqon

Vaşinqton/14.09.22/Turan: Ukraynanın Rusiya işğalına qarşı əks hücumunda uğuru onun müttəfiqlərini və tərəfdaşlarını təəccübləndirmədi. "Təəccüblənən biri varsa... ruslardır", deyə çərşənbə günü keçirilən brifinqdə Pentaqonun mətbuat katibi Pet Rayder bildirib.

Qərbin silahları və dəstəyi əks hücumun uğurunda öz rolunu oynayıb, deyə Rayder bildirib. ABŞ-ın müdafiə naziri Ostin və digər liderlər müntəzəm olaraq Ukraynalı həmkarları ilə əlaqə saxlamağa davam edirlər.

Rayderin sözlərinə görə, Ukrayna qüvvələri əks hücumda əllərində olan texnikadan səmərəli şəkildə istifadə edirlər və döyüş meydanında dinamikanı dəyişdiriblər. Onun sözlərinə görə, Ukrayna hərbiçiləri həmçinin davam edən münaqişədən dərs çıxarıblar və NATO-nun döyüş taktikasını mənimsəyərək, müharibə aparmağın ümumqoşun üsulunu tətbiq ediblər.

Öz növbəsində, Ağ Ev çərşənbə axşamı Ukrayna qüvvələrinin Rusiyaya qarşı hücumunu "təşəbbüsün ələ alınması" kimi səciyyələndirib, amma Ukraynada davam edən müharibənin hələ də proqnozlaşdırılmasının mümkün olmadığı barədə xəbərdarlıq edib.

"Düşünürəm ki, sizin gördükləriniz, şübhəsiz ki, Ukrayna hərbiçilərinin təşəbbüsü ələ almasıdır", deyə brifinqdə Milli Təhlükəsizlik Şurasının nümayəndəsi Con Kirbi bildirib.

Eyni zamanda, o, bunu Ukraynanın vəziyyəti tamamilə dəyişdirməsinin əlaməti kimi qiymətləndirməyib. 0