Ukraynaya qarşı təcavüz-1-ci gün

Bakı/24.02.22/Turan: Luqansk vilayətində işğalçılar iki kəndi ələ keçirib və Lutskda teleqülləni partladıblar.

Bu barədə səhər saat 8-də Ukrayna mətbuatı məlumat yayıb.

Kiyev də daxil olmaqla, ölkənin hər yerində hərbi obyektlərə raket və bomba hücumları edildiyi bildirilir.

Xmelnitski vilayətində top atəşi nəticəsində Starokonstantinov kəndindəki hərbi hissədə, Dnepropetrovsk vilayətində Krasnopolye və Marqanets dağlarında - hərbi anbarlarda, Vinnitsa bölgəsində Tulçin və Boxan şəhərlərində - hərbi hissələrdə, Kiyev vilayətində Brovarı şəhəri yaxınlığındakı hərbi hissədə yanğın olub.

Düşmən Luqansk vilayətinin Qorodişçe və Melovoe kəndlərini tutub.

Xatırladaq ki, Rusiya fevralın 24-də, saat 5:00-da hərbi əməliyyatlara başlayıb.

Rusiya Silahlı Qüvvələri ölkənin şərqində Ukrayna ordusunun bölmələrini intensiv atəşə tutmağa başlayıb. Borispol, Ozernı, Kulbakin, Çuqev, Kramatorsk, Çernobaevka aerodromlarına, eləcə də digər hərbi obyektlərə raket və bomba zərbələri endirilib.

Eyni zamanda Ukraynanın dövlət sərhədi boyu ərazisi və yaşayış məntəqələri artilleriyadan atəşə tutulub.

Jurnalist Andrey Tsaplienko bildirir ki, işğalçı Kiyevə qarşı qanadlı və ballistik raketlərdən istifadə edib.

“Kiyevdəki strateji obyektlərə qanadlı və ballistik raketlər atılır,” o, Teleqram kanalında yazıb.

Çerniqov vilayətinin Nijin şəhərində raket hücumu Nijın aerodromunun idarəetmə mərkəzini məhv edib.

UNİAN agentliyinin məlumatına görə, fevralın 24-də səhər tezdən Kiyevdə partlayış səsləri eşidilib. Ən azı dörd partlayışın Kramatorskda, güclü partlayışın Odessa, Xarkov, Berdyanskda baş verdiyi bildirilir.

Paytaxtın Borispol hava limanı ərazisində partlayışlar və atışmaların olduğu bildirilir.

Səhər saat 10-da Ukraynanın Baş Qərargahı düşmənin beş təyyarəsi və bir helikopterinin vurulduğunu bildirib. -02D-