Vasitəçilər işğal edilmiş əraziləri erməni tapdağı altında saxlamaq istəyirdilər – İ.Əliyev

Bakı/12.04.21/Turan: “Bütün bu illər ərzində bizi aldatmağa çalışmışlar. Məsələni həll etmək yox, dondurmaq istəmişdilər. Bu məsələ ilə bilavasitə məşğul olan beynəlxalq qurumlar bu torpaqları erməni tapdağının altında daim saxlamaq istəmişdilər”. Bu barədə dövlət başçısı İlham Əliyev bazar ertəsi Hərbi Qənimətlər Parkının açılış mərasimində bir qrup hərbiçi qarşısında çıxış edərkən bildirib.

“Ancaq bununla paralel olaraq danışıqlar apararaq, eyni zamanda, hazırlıq işləri də gedirdi. Mən bunu gizlətmirdim”, deyə o qeyd edib.

Bir tərəfdən asılı olmamaq üçün silahlar müxtəlif yerlərdən alınırdı.

“Müharibə gedə-gedə bizə qarşı sanksiyalar tətbiq etmək istəyirdilər. Kim idi bunları təşkil edən? Minsk qrupuna həmsədrlik edən ölkələr. Kim bunun qarşısını aldı? Bizə dost olan ölkələr, Qoşulmama Hərəkatına üzv olan ölkələr”, deyə Əliyev bildirib. 

2016-cı il aprel müharibəsindən sonra Ermənistanın o vaxtki başçısı Sarkisyan iğal eşdilmiş torpaqları qaytarmağa söz verdi və iki həftə vaxt istədi, deyə Əliyev qeyd edib.

Amma ondan sonra orada polis bölməsi zəbt edildi, Sarkisyan bunu bəhanə edərək sözünü yerinə yetirməkdən imtina etdi, deyə o, bildirib.

2018-ci ildə Ermənistanda hakimiyyət dəyişikliyindən sonra Paşinyan da münaqişəni həll etməyə söz verdi, daxili problemləri həll etmək üçün vaxt istədi, “amma ermənilər bizi yenə aldatdılar”. Aydın oldu ki, danışıqlar mənasızdır, deyə Əliyev bildirib.

İkinci Qarabağ müharibəsinin gedişatı məlumdur, biz Şuşanı azad etdikdən sonra Ermənistan kapitulyasiya aktına imza atıb.

“Bu gün orada baş qaldıran bəzi revanşist qüvvələr də bilməlidirlər, dəmir yumruq yerindədir”, deyən Əliyev qələbəni təmin edən, azərbaycanlıların üzünü ağ edən və yeni reallıq yaradan hərbiçilərə təşəkkürünü bildirib.

“Bu gün hər kəs bizimlə hesablaşmalıdır və hesablaşacaqdır”, deyə İlham Əliyev sonda vurğulayıb. -02D-