Vendi Morton: Azad mətbuat və dinamik vətəndaş cəmiyyəti inkişafın əsasıdır

Bakı/09.02.21/Turan: Azərbaycan və Böyük Britaniya arasında münasibətlər güclü siyasi və diplomatik əlaqələrdən başqa, həm də qarşılıqlı faydalı ticarət şəbəkələrinə və Avropa İnsan Hüquqları Konvensiyasını ümumi qəbul etməyimizə də əsaslanır. Bu barədə Böyük Britaniyanın Avropa məsələləri üzrə dövlət naziri Vendi Morton 8-9 fevral tarixlərində Azərbaycana ikigünlük səfərinə yekun vurarkən KİV-ə müsahibəsində bildirib.

“Azərbaycanın dini müxtəlifliyə dəstəyi çox mütəəssiredicidir. Açıq cəmiyyətlər daha ədalətli cəmiyyətlərdir və gələcəyin çağırışlarına cavab vermək üçün daha yaxşı böyüyüb inkişaf edə bilərlər. Azad mətbuat, xüsusən müxtəlif və dinamik bir vətəndaş cəmiyyəti hərəkatının dəstəyi ilə bu günün və sabahın əsas məsələləri ətrafında müzakirələr aparmaq üçün bir fürsət verərək bu işi dəstəkləmiş olur. Azərbaycanın açıq cəmiyyətin faydalarını əldə etməsi üçün daha çox iş görülə bilər və səfərim zamanı bir sıra fərqli təşkilatların nümayəndələri ilə görüşdüm”, deyə Morton sözünə davam edib.

Britaniya təhsili Azərbaycan mədəniyyətinə dəyərli töhfə verib və verməyə davam edəcək. “Azərbaycanda Britaniyanın maliyyələşdirdiyi bir sıra ingilis dili resurs və təlim mərkəzlərindən birini ziyarət etdim. Bu mərkəzlər azərbaycanlılara dünya dili olan ingilis dilini öyrənməkdə kömək edir. Bu dəstək xüsusilə ən həssas qruplara yönəldilmişdir - məcburi köçkünlərin uşaqları. Britaniya universitetləri və təqaüdləri Böyük Britaniya ilə möhkəm və davamlı əlaqələri olan gənc məzunlardan ibarət bir qrup yaratdı. Onlarla görüşü səbirsizliklə gözləyirəm. Britaniya dizaynı Bakının imicini dəyişdirdi: taksilərimiz və memarlığımız buraya öz təsirini göstərdi və inanıram ki, Azərbaycan Britaniyanın ən yaxşı təcrübəsindən bəhrələnməyə davam edəcək”, deyə Morton qeyd edib.

O, 27 il əvvəl imzalanmış “Əsrin müqaviləsi”ndən sonra iki ölkə arasında ticarət münasibətlərinin inkişafını xüsusi olaraq vurğulayıb. “Gələcəkdə Azərbaycan bərpa olunan enerji mənbələrinə doğru irəlilədikcə və iqtisadiyyatını şaxələndirdikcə münasibətlərimiz inkişaf edəcəkdir. Böyük Britaniya hər zaman Azərbaycanı əsas ticarət və investisiya tərəfdaşı kimi dəstəkləyəcəkdir”, deyə Morton bildirib. -06D-