Vüqar Süleymanov Minatəmizləmə Agentliyinin rəhbəri təyin edilib

Bakı/04.02.21/Turan: Vüqar Əhəd oğlu Süleymanov Azərbaycan Respublikasının Minatəmizləmə Agentliyinin İdarə Heyətinin sədri təyin edilib.

V.Süleymanov bu təyinata qədər Ekologiya və Təbii Sərvətlər Nazirliyinin Aparat rəhbəri olub.

V. 1965-ci ildə anadan olub. M.V.Lomonosov adına Moskva Dövlət Universitetinin tarix fakültəsi və Azərbaycan Dövlət İqtisad Universitetinin xarici iqtisadi əlaqələr fakültəsini bitirib.

2002-2005-ci illərdə Azərbaycan Ərazilərinin Minalardan Təmizlənməsi üzrə Milli Agentlikdə (ANAMA) partlamamış hərbi sursat əməliyyatları üzrə mütəxəssis, 2005-2018-ci illərdə özəl təşkilatlarda çalışıb.

2018-2020-ci illərdə Ekologiya və Təbii Sərvətlər Nazirliyində baş məsləhətçi, şöbə müdiri vəzifəsində çalışıb.

21 aprel 2020-ci ildən Ekologiya və Təbii Sərvətlər Nazirliyinin Aparat rəhbəri vəzifəsində işləyib.

Prezidentin 15 yanvar 2021-ci il tarixli sərəncamı ilə ANAMA ləğv edilərək onun bazasında Azərbaycan Respublikasının Minatəmizləmə Agentliyi yaradılıb.-03-