XİN və Baş Prokurorluq: Ermənistan SQ-nin atəşi nəticəsində 10 nəfər azərbaycanlı mülki şəxs həlak olub, 30 nəfər yaralanıb

Bakı/29.09.20/Turan:  27-29 sentyabr tarixlərində erməni ordusunun Azərbaycanın yaşayış məntəqələrini atəşə tutması nəticəsində 10 nəfər həlak olub, 30 nəfər yaralanıb.  Bu barədə Azərbaycan XİN və Baş Prokurorluğun birgə bəyanatında deyilir.

Əsasən Tərtər, Ağdam, Cəbrayı, Goranboy, Naftalan və Daşkəsən rayonları atəşə məruz qalıb.

Ermənistan beynəlxalq hüququn norma və prinsiplərini, xüsusilə də beynəlxalq humanitar hüquq və 1949-cu il Cenevrə Konvensiyaları və onların Əlavə protokollarını kobud şəkildə pozaraq Azərbaycanın mülki əhalisini və infrastrukturunu məqsədyönlü şəkildə atəşə tutub, bununla da mülki əhaliyə qarşı müxtəlif cinayətlər törədib. 

29 sentyabr 2020-ci il tarixinə olan məlumata əsasən mülki əhali arasında 10 nəfər  həlak olub, 30 nəfər isə yaralanıb.  Həlak olanlar arasında 13, 14 yaşlarında iki məktəbli də var. 

Naftalan şəhəri yaxınlığındakı Qaşaltı-Qaraqoyunlu kəndində bir ailənin 5 üzvü qətlə öldürülüb. Kənd sakini Elbur İsa oğlu Qurbanov və onun 4 nəfər ailə üzvü, o cümlədən iki övladı öldürülüb.

Atəş nəticəsində Ağdam rayonunun Evoğlu kənd sakini Coşqun Ənvər oğlu Paşayev, Tərtər rayon sakini Mehman Sovet oğlu Əliyev, Tərtər rayonunun Şıxar qəsəbəsi sakinləri Xaliq Asif oğlu Abbasov və Elşən Asif oğlu Abbasov qardaşları həlak olublar.

Bu faktlar üzrə Cinayət Məcəlləsinin  120.2.1-ci (cinayətkar birlik–təşkilat tərəfindən qəsdən adam öldürmə), 120.2.4-cü (qabaqcadan əlbir olan bir qrup şəxs tərəfindən xuliqanlıq niyyəti ilə xüsusi amansızlıqla qəsdən adam öldürmə), 120.2.7 (iki və ya daha çox şəxsi qəsdən öldürmə), 120.2.12-ci (milli, irqi, dini ədavət və ya düşmənçilik niyyəti ilə qəsdən adam öldürmə), 100.2 (təcavüzkar müharibəni aparma) və digər maddələri ilə cinayət işi başlanıb. 

XİN və Baş Prokurorluq beynəlxalq ictimaiyyəti Ermənistanın Azərbaycana qarşı yeni təcavüzünü, azərbaycanlı mülki şəxsləri və infrastrukturu atəşə tutmasını kəskin qınamağa və Ermənistan tərəfindən beynəlxalq hüquq, o cümlədən beynəlxalq humanitar hüquq öhdəliklərinə əməl olunmasını təmin etməyə çağırıblar.—06D-