YAP parlamentin əvvəlki tərkibindəki  təxminən 50-dək deputatının  namizədliyini yenidən irəli sürüb 

Bakı/27.12.19/Turan: Bu gün hakim Yeni Azərbaycan Partiyasının İdarə Heyəti fevralın 9-da keçiriləcək növbədənkənar parlament seçkilərinə deputatların namizədlərin siyahısını açıqlayıb.

Partiya adından 125 dairədə 123 namizəd irəli sürülüb.

YAP 3 saylı Babək-Kəngərli-Naxçıvan seçki dairəsində deputat mandatı uğrunda mübarizəyə qoşulmayıb.

Ötən seçkilərdə həmin dairədən Azərbaycan Həmkarlar İttifaqları Konfederasiyasının prezidenti, bitərəf Səttar Mehbalıyev seçilmişdi. Görünür, bu seçkilərdə də həmin dairədə hakimiyyətin gizli namizədi o olacaq. 

Həmçinin YAP 122 saylı  Xankəndi dairəsində də namizəd irəli sürmür.

Burada məlumdur ki, hakimiyyət Dağlıq Qarabağın azərbaycanlı icmasının lideri Tural Gəncəliyevə “stavk»  edəcək.

YAP-ın  siyahısında keçmiş deputatlar, SOCAR prezidenti Rövnəq Abdullayev və “Azərbaycan Dəmir Yolları” QSC-nin rəhbəri Cavid Qurbanov yoxdur. 

YAP vitse-spiker, partiyanın icra katibinin müavini Bahar Muradovanın da namizədliyini irəli sürməyib. Yəqin ki, onu digər qurumlarda  rəhbər vəzifəyə keçirəcəklər.

Namizədlərın sırasında YAP-ın təsisçilərindən biri, Regional məsələlər komitənin rəhbəri Arif Rəhimzadə və Elm və təhsil komitəsinin sədri, Azərbaycan Dövlət İqtisad Universitetinin keçmiş rektoru Şəmsəddin Hacıyev də yoxdur. 

Siyahıda Prezident administrasiyasının sabiq rəhbəri Ramiz Mehdiyevin kürəkəni İlham Əliyevin də adı yoxdur.

Ümumiyyətlə parlamentin əvvəlki tərkibindən 18 nəfəri YAP namizədlər siyahısına daxil etməyib.

YAP yenidən spiker Oqtay Əsədov, birinci vitse-spiker Ziyafət Əsgərov, NMR Ali Məclisinin rəhbəri Vasif Talıbovun deputatlığa namizədliyini irəli sürüb.

Həmçinin YAP növbəti dəfə  öz siyahısına Aqrar komitənin sədri Eldar İbrahimov, Beynəlxalq münasibətlər komitəsinin rəhbəri Səməd Seyidov, Hüquq siyasəti və dövlət quruculuğu komitəsinin rəhbəri Əli Hüseynli, İctimai birliklər və dini qurumlar komitəsinin rəhbəri Siyavuş Novruzov, Ailə, qadın və uşaq komitəsinin sədri Aqiyə Naxçıvani, Səhiyyə komitəsinin sədri Əhliman Əmiraslanov, Sosial siyasət komitəsinin rəhbəri Hadı Rəcəbli, partiya Qadınlar Şurasının sədri Məlahət İbrahimqızı, Rauf Əliyev, Nizami Cəfərov, Aydın Mirzəzadə, “Yeni Azərbaycan” qəzetinin redaktoru Hikmət Babaoğlu, “Azərbaycan” qəzetinin redaktoru Bəxtiyar Sadıqov, politoloq Elman Nəsirov, AŞPA-da nümayəndə heyətinin üzvləri Sevinc Fətəliyev,  Sahib Qafarov, rus icmasının rəhbəri Mixail Zabelin, Sosial məsələlər komitəsi sədrinin müavini Musa Quliyev, sahibkarlar Tahir Mirkişili, İqbal Məmmədov, Cavanşir Paşazadə (şeyxülislam Allahşükür Paşazadənin qardaşı) və başqalarını daxil edib.

Ümumiyyətlə parlamentin əvvəlki tərkibindən 47 deputatı YAP yenidən namizəd  kimi irəli sürüb.

Eyni zamanda dairələrin təxminən  üçdə ikisində YAP  yeni şəxslərin namizədliyini irəli sürüb.

Lakin yeni namizədlər geniş ictimaiyyətə o qədər də məlum deyil.

Onların arasında Ailə, Qadın və Uşaq Problemləri üzrə Dövlət Komitəsinin rəhbəri Hicran Hüseynova diqqəti çəkir.06D-