Yaponiya hökuməti Azərbaycana 1.2 milyon dollar yardım ayırıb

Bakı/17.02.21/Turan: Fevralın 16-da Yaponiya hökuməti Azərbaycan və Ermənistan arasında baş vermiş silahlı toqquşma nəticəsində yaranan humanitar böhranla bağlı yardım qismində Azərbaycana 1.2 milyon dollar məbləğində təcili qrant ayrılması barədə qərar qəbul edib. Bu barədə Yaponiyanın Azərbaycandakı səfirliyi məlumat yayıb.

Məlumatda deyilir ki, bu, Birləşmiş Millətlər Təşkilatının Qaçqınlar üzrə Ali Komissarlığı (UNHCR), BMT-nin Dünya Qida Proqramı (WFP) və Beynəlxalq Qırmızı Xaç Komitəsi (ICRC) tərəfindən beynəlxalq cəmiyyətə ünvanlanan yardım müraciətinə əsaslanaraq, zərərçəkmiş və evakuasiya məkanlarının bərpası, tibb sahəsinə dəstək, yardım ləvazimatlarının təqdim olunması kimi yaşam şəraitinin yaxşılaşdırılmasına yönəlmiş qrant yardımıdır.

Qrant vəsaiti bir qabaqcıl xəstəxananın tibbi avadanlıqlarla təchiz edilməsinə, təxminən 500 nəfərin təhlükəsiz su mənbələrinə çıxışının, təxminən 6400 nəfər üçün müvəqqəti sığınacaq yerlərinin bərpası və soyuqla mübarizə aparmaq üçün yardım ləvazimatları ilə təmin olunmasına, təxminən 8000 nəfər üçün qida yardımının həyata keçirilməsinə yönəldiləcək. 

 Azərbaycan müstəqillik qazandıqdan sonra Yaponiya hökuməti Azərbaycanda inkişafa rəsmi yardım layihələrinin icrasına başlayıb. İndiyədək təxminən 1 milyard dollar məbləğində güzəştli kredit, 100 milyon dollardan çox qrant layihəsi həyata keçirib.

“Bundan sonra da Azərbaycana yardımı davam etdirmək niyyətindəyik”, deyə səfirliyin məlumatında qeyd edilir. -03-