Yerevanda Ermənistan sərhədini keçən iki azərbaycanlı əsgərdən birinin işi üzrə məhkəmə başlayır

Bakı/09.06.23/Turan: Ermənistanda ölkə sərhədini qanunsuz keçməkdə və Qafanda keşikçini öldürməkdə ittiham olunan azərbaycanlı əsgər Hüseyn Axundovun işi üzrə məhkəmə başlayır. Bu barədə cümə günü Ermənistan KİV-ləri məlumat yayıb.

Xatırladaq ki, Naxçıvan ərazisində Azərbaycanın Ermənistanla sərhədində hərbi xidmətdə olan əsgərlər Hüseyn Axundov və Aqşin Bəbirov bu il aprelin 10-da itkin düşüblər.

Elə həmin gün Ermənistan tərəfi onlardan birinin Sünik vilayətindəki kəndlərdən birində saxlanıldığı haqqında məlumat yayıb. Bu zaman baş nazir Paşinyan əsgərlərin yoldaşları tərəfindən ələ salındıqlarına görə könüllü olaraq Ermənistan tərəfə keçdiklərini bildirib. O, həmçinin saxlanılan şəxsin (Bəbirovun) Azərbaycana qayıtmaq istəmədiyini bildirdiyini, Ermənistanın isə onu təhvil vermək niyyətində olmadığını qeyd edib.

Aprelin 13-də Ermənistan tərəfi ikinci əsgərin (Axundov) saxlanıldığını bildirib, o, Qafan şəhəri yaxınlığındakı müəssisələrdən birinin keşikçisini öldürməkdə ittiham olunub.

Mayın 22-də keçirilən mətbuat konfransında Paşinyan deyib ki, Ermənistan iki azərbaycanlı hərbiçini Bakıya qaytara bilər. "Münasibətlərin normallaşması çətin və mühüm qərarların qəbul edilməsini nəzərdə tutur. Amma belə qərarlar birtərəfli qaydada qəbul edilmir. Biz hüquqi prosedurlar başa çatdıqdan sonra məsələni müzakirə etməyə hazırıq", deyə o bildirib.

Qeyd edək ki, mayın 26-da Azərbaycan Müdafiə Nazirliyi sərhəddə iki erməni diversiyaçının saxlanıldığı haqqında məlumat yayıb.

Göründüyü qədər, formal məhkəmə prosesləri başa çatdıqdan sonra iki azərbaycanlı əsgər iki erməni əsgərlə dəyişdiriləcək. 02D