Bəxtiyar Hacıyev: “Hakimiyyət sosial şəbəkələrə uduzur”

Bakı /09.01.19/Turan: Azərbaycanda ifadə azadlığı üçün yeganə platforma sosial şəbəkələrdir. Bu barədə ictimai fəal Bəxtiyar "Amerikanın səsi" radiosunun Azərbaycan xidmətinə müsahibəsində deyib.

Onun sözlərinə görə, bloger Mehman Hüseynova qarşı yeni cinayət işi sosial şəbəkələrdə qızğın müzakirələrə səbəb olub. Çünki həbsxanada olan blogerə qarşı yeni ittiham həqiqət deyil və bu, istifadəçiləri səfərbər etdi.

"Əgər ilk günlərdə 10-15 nəfər bu barədə yazırdısa, növbəti günlərdə prosesə yüzlərlə, minlərlə adam qoşuldu", - B.Hacıyev deyib.

M.Hüseynovun işinə diqqətin artmasının bir səbəbi də cəmiyyətdə olan gərginliyin dərəcəsidir. Çünki bir gənc özünün şərlənməsinə etiraz olaraq həyatını riskə atıb aclıq aksiyası keçirir. Bütün bunlar müxalifəti və vətəndaş cəmiyyətini fəallaşdırıb. Eyni zamanda hökumət artıq müəyyən cavablar verməyə məcbur olub.

"Bu, göstərir ki, hökumət sosial şəbəkələrdəki canlanmadan və reaksiyadan çox narahatdır", - B.Hacıyev qeyd edib.

Sosial şəbəkələr hakimiyyətin nəzarətində olmayan yeganə sahədir və hökumət ictimai rəyin dəyişdirməyə səy göstərir. Lakin bu, çox qeyri-peşəkarcasına edilir.

Hökumətə qarşı tənqidləri neytrallaşdırmaqdan ötrü trollardan istifadəy gəlincə, o qeyd edib ki, bu cür metodlar hər yerdə var. İri şirkətlər özləri haqda müsbət ictimai rəy formalaşdırmaqdan ötrü buna əl atırlar.

Azərbaycanda troll fabriki çox qeyri-peşəkardır və primitiv idarə olunur. Orta statistik bir istifadəçi hər hansı bir troll profilinin səhifəsinə keçməklə ilk beş saniyədə başa düşür ki, o, troldur. Görəndə ki, bu, troldur və mövzu ilə əlaqəsi olan şərhlər yazmır, sırf statistika olsun deyə yazır, qıcıq yaradır.

Odur ki, hökumət nə qədər çalışsa da cəmiyyətdə çox az sayda fikir öndərləri var ki, onların yazdıqları bir məsələ sosial şəbəkələrdə bütün cəmiyyətin ictimai rəyini çox rahatca dəyişir.

Sosial şəbəkələr müxalifətin, alternativ fikir daşıyıcılarının hökumətin üzərində üstünlük təşkil etdiyi platformaya çevrilib. Bu, onu göstərir ki, hökumət sosial şəbəkələrdə birmənalı şəkildə vətəndaşlara, vətəndaş cəmiyyətinə uduzur, B.Hacıyev bildirib.-06D--