Ukraynalılar heç vaxt marionet lideri qəbul etməyə razılaşmayacaqlar

* * *

Xanım Sinsadze, Ukrayna hadisələrini necə qiymətləndirirsiniz? Ukraynalılar baş verənlərə hazırmıydı? İndi Ukraynada siyasi-psixoloji vəziyyət necədir?

Ukraynada hazırki hadisələr Moskvanın əsrlər boyu Ukraynanı öz içinə qatmaq, bizi Yer üzündən silmək və nəhayət, tariximizi və mədəniyyətimizi mənimsəmək cəhdlərinin kulminasiya nöqtəsidir. Ukrayna olmasaydı, heç bir Rusiya imperiyası və xəyali böyüklük olmazdı. Bu mif Ukrayna olmadan tutarsızdır. İndi sivilizasiyaların həlledici döyüşü gedir. Xatırladım ki, Ukrayna xalqı artıq 8-ci ildir ki, Rusiyanın təcavüzünü (300 ildən çoxdur ki, fasilələrlə davam edir) dəf edir və biz bu müddətdə xeyli güclənmişik. Amma əlbəttə ki, xalqımız rus işğalçılarının bizim torpağımızda törətdikləri vəhşiliklərə hazır deyildi. Ancaq biz işğalçıları uğurla məğlub edirik, xalq heç zaman olmadığı qədər birləşib. Bu, əsl qurtuluş savaşıdır, həqiqət uğrunda, xeyirin şərə qarşı savaşıdır. 

Ukraynalılar öz mübarizələrində tək olduqlarını hiss etmirlərmi? Qərb bəyanatlar verir, sanksiyalar tətbiq edir, amma əməli dəstək yoxdur. Ukrayna Rusiyaya qarşı tək savaşır. Adamlar bu barədə nə düşünürlər? Bu, onlara necə təsir edir?

Biz heç vaxt kiməsə xüsusən arxalanmamışıq, bilirik ki, heç kim bizim üçün döyüşməyəcək. Eyni zamanda, Qərb bizə fəal yardım göstərir və onların siyasəti hər gün fövqəladə dəyişikliklərə məruz qalır. Silahlara, sanksiyalara, maliyyə, humanitar, diplomatik dəstəyə və qaçqınların qəbuluna görə tərəfdaşlarımıza minnətdarıq. Biz, ukraynalılar birlikdə çalışırıq ki, Qərb daha da qətiyyətli addımlar atsın. Ukraynalılar hər şeyi görür və hər şeyi yadda saxlayırlar - köməyi, fəaliyyətsizliyi və susqunluğu. İndi susanlar biz qalib gələndə çox utanacaqlar.

Belə bir fikir var ki, Qərb Ukraynanı öz maraqlarına qurban verir. Başqa sözlə, Qərb Ukrayna ilə baş verənlərə əsaslanaraq Rusiyanı diz üstə çökdürməyə çalışır. Onlar Ukraynanın bu vəziyyətdən çıxmasında yox, Rusiyanın devrilməsində maraqlıdırlar. Bu fikirlərlə bağlı nə deyə bilərsiniz?

Əvvəla, Ukrayna ilə yox, Ukraynada. Artıq rus əsgərləri torpağımızın dadına baxaraq bunu başa düşüblər. İkincisi, sizin sualınız sırf Moskva hekayəsini retranslyasiya edir. Heç kim Rusiyaya hücum etməyib. Rusiya Ukraynaya hücum edib və uzun illərdir ki, müharibədən sonrakı dünya düzənini məhv edərək bütün azad dünyaya qarşı hibrid müharibəsi aparır. Sizin səsləndirdiyiniz tezis yalnız bir məqamda doğrudur – Rusiyanı məğlubiyyət gözləyir, ancaq Qərbin istəyilə yox, Rusiyanın özünün rəhbərliyinin cinayətkar əməlləri və rusların müharibə sevgisilə. Onlar müharibə istəyirdilər - bu qaniçən imperiyanın süqutuna qədər bütün nəticələrilə bunu alacaqlar. Biz onu məzara gömməkdən, bu həbsxanada əziyyət çəkmiş və əziyyət çəkən bütün xalqlara böyük yaxşılıq etməkdən şərəf duyarıq.

Siyasi icmalçılar deyirlər ki, Rusiyanın əsas məqsədi Ukraynada hakimiyyəti ələ keçirməkdir. Yəni, Ukraynada hakimiyyət dəyişikliyinə nail olmaq və marionet lider təyin etmək. Vəziyyət pisləşərsə, ukraynalılar bununla razılaşacaqlarmı?

Hələ ki vəziyyət ancaq Rusiyanın özü üçün pisləşir. Hesab edirəm ki, bizim indi nümayiş etdirdiyimiz təcavüzkara ümumxalq müqaviməti elə sizin sualınıza cavabdır. Ukraynalılar heç vaxt marionet liderlə razılaşmayacaqlar. Təəssüf ki, buna daha bir canlı sübut Rostovda oturan Yanukoviçdir.

Ukrayna, postsovet ölkələri və Qərb bu vəziyyətdən hansı nəticəni çıxarmalıdır?

Rusiya özünün hazırkı formasında heç vaxt etibarlı tərəfdaş olmayacaq. Bu  yanacaqdoldurma məntəqəsi ölkəsinin dostu olmur, ya köləsi olur, ya da düşmənləri. Rusiyanın yaxınlığında yaşayarkən, bir saniyə belə rahat olmaq mümkün deyil. Bu Mordor məhv edilməlidir və bundan sonra dünya heç vaxt tiranları yatışdırmamalıdır.

Kamran Mahmudov

Rəy yaz

Sual-cavab

İran Prezidentinin həlak olduğu hadisə Azərbaycan- İran münasibətlərinə təsir edə bilərmi? – Nəsimi Məmmədli Çətin sualda



Bizi sosial şəbəkələrdə izləyin

Xəbər lenti