12 yaşlı uşağı təpikləyən polis səlahiyyətlərini bilmirmi? – Nəsimi Məmmədli saat 16:00-da Çətin sualda

Bakı/04.12.23/Turan: Sosial şəbəkələrdə polisin uşağı yerə yıxıb təpiklədiyini əks etdirən videogörüntülər yayılıb. Elə həmin görüntülərdə digər polis bir nəfəri də zorakılıqla Post-Patrul Xidmətinin maşınına mindirməyə çalışır.

Hadisənin dekabrın 2-də Qəbələ rayonunun Vəndam qəsəbəsində baş verdiyi bildirilir. Görüntülərdə polislərin döydüyü isə 12 yaşlı Dəniz Ağayev və atası olduğu deyilir.

12 yaşlı Dəniz Ağayevi yerə yıxıb təpikləməsilə bağlı Daxili İşlər Nazirliyi açıqlama yayıb.Nazirliyin mətbuat xidmətindən verilən məlumatdan aydın olur ki, polis cəzalandırılıb.

“S.Ağayev sərxoş vəziyyətdə avtomobil idarə edərək ictimai yerdə təhlükəli vəziyyət yaradıb. O, saxlanılan zaman onunla birlikdə olan yaxın qohumları və yanlarında olan yetkinlik yaşına çatmayan şəxs polis əməkdaşlarına müqavimət göstərib, daşla xəsarət yetirməyə və xidməti avtomobilə zərər vurmağa cəhd ediblər.

Fakta görə cinayət işi qaldırılıb və iki nəfər həbs edilib.

Eyni zamanda yetkinlik yaşına çatmayan şəxsə qarşı səlahiyyət həddini aşan polis əməkdaşı barəsində xidməti yoxlama aparılaraq o daxili işlər orqanlarından xaric edilib”, – DİN-in mətbuat xidmətinin yaydığı məlumatda deyilir.

Son günlər ölkə gündəmində baş verən bu və digər hadisələrlə bağlı siyasi şərhçi Nəsimi Məmmədli Kamran Mahmudovun təqdimatında yayımlanan “Çətin sual” verilişində danışır.