Etirazlar zəruri islahatların aparılmamasından qaynaqlanır

***

-Nigar xanım, hazırda atanız və həyat yoldaşınız inzibati həbsdədir. Qardaşınızı tez-tez polis bölməsinə çağırırlar. Facebook-da yazdığınıza görə, eviniz polis nəzarətindədir. Nə istəyirlər sizin ailədən?

-Düşünmürəm ki, tək bizim ailə bu aqibəti yaşayır. Düzdür, bizdə durum bir az fərqlidir. Çünki ailəmin əksər üzvü (içi mən qarışıq) Əliyev rejimi ilə mübarizə aparır. Görünür, hökumət həm atamı, həm də həyat yoldaşımı həbs etməklə kifayətlənmək istəmir. Onlar həbsdə ola-ola ailənin digər üzvlərinə də təzyiq edirlər. Bu yolla bizi susdurmağı düşünürlər.

-Konkret olaraq qardaşınızla (RəhimYaqublu- red.) polis bölməsindəki görüşlərdə nə deyirlər? Nə tələb edirlər? Atanız bu dəfə həbsdə işgəncəyə məruz qalıb. Yazdığınıza görə, onunla fərdi söhbətlər aparıblar. Bu fərdi söhbətlərdə, görüşlərdə atanızdan, həyat yoldaşınızdan, qardaşınızdan nə tələb olunur? Onları nə ilə təhdid edirlər?

-Qardaşımı polis bölməsinə anket məlumatları doldurmaq adı ilə çağırıb orada mənəvi təzyiq edirlər. Hədə-qorxu gəlirlər. Mitinqə getmə deyirlər, əks halda sizinlə bağlı tədbir görəcəyik deyirlər.

Atayla bağlı durum bir az fərqlidir. Bildiyiniz kimi, Tofiq Yaqublu tək Müsavat Partiyasının üzvü deyil, eyni zamanda Milli Şuranın üzvüdür.Milli Şura  hakimiyyətə qarşı kəskin mübarizə aparır. Hökumət isə ona mane olanları bir-bir zərərsizləşdirmək istəyir. Tofiq Yaqublunun 19 oktyabrda başına gələnlərdən xəbəriniz var çox güman. Ona və Əli Kərimliyə (AXCP sədri-red.) amansız işgəncələr verilib. Ataya olan tələb ondan ibarətdir ki, Milli Şuradan istefa versin. Ümumiyyətlə, siyasətdən getsin. Əks-təqdirdə onu “bandotdel”ə aparıb yenidən işgəncə verəcəklərini bildiriblər.

-Niyə məhz sizing ailə seçilib? Azərbaycanda xeyli mübarizə aparan insanlar var. Tofiq Yaqublu və ya SeymurHəzidən niyə belə narahatdırlar?

Çünki TofiqYaqublu bu mübarizəyə həyatını, canını qoyub. Heç vaxt hakimiyyətlə barışmayıb və prinsipial mövqe göstərib. Eyni hal Seymur üçün də keçərlidir.

-Baş verənlər, təhdidlər, təqiblər sizə, ailə üzvlərinizə necə təsir göstərir? Və ya sizin mübarizə fəaliyyətinizə hər hansı təsiri olacaqmı?

-Əlbəttə, təzyiqlər xoş deyil, ancaq bu o demək deyil ki, təzyiq görən kimi geri addımlar ataq. Bizim ailə nələr görüb. Düzdür, Tofiq Yaqubluya qarşı olan son işgəncələr artıq hökumətin bütün sərhədlərini tapdaladığını göstərdi. Bu etdikləri cavabsız qalmayacaq. Mütləq bunun hesabını verəcəklər. Bütün bu tapşırıqları verən isə İlham Əliyevdir. Bizim ailəyə bir şey olsa bunun məsuliyyəti İlham Əliyevin üzərindədir.

-Son vaxtlar müxalif cameədə bir canlanma yaranıb. Görünür, hakimiyyəti də narahat edən məhz bu canlanmadır. Sizcə, son vaxtlar müxalif cameənin fəaliyyətindəki bu canlanmanın səbəbi nədir? Və sizcə, iqtidar niyə bu canlanmadan bu qədər narahatdır?

-İqtidar niyə bu canlanmadan narahat olmasın ki? 26 illik diktatura dönəmində idarə olunan bir xalq əlbəttə ki, ölkədəki durumdan narazıdır. Əhali artıq dəyişiklik istəyir. Proses  19 yanvar mitinqindən sonar yeni mərhələyə qədəm qoydu. 8 oktyabrda Milli Şuranın keçirdiyi piket canlanmaya təkan verdi.

19 oktyabrda keçirilən mitinq isə onu göstərdi ki, razılaşdırılmamış olsa da mitinqə gələnlər çoxdur. Hakimiyyətin bütün çabalarına baxmayaraq, etirazı boğmaq mümkün deyil. Artıq cəmiyyət də əvvəlki deyil. Xalq indiki durumdan cana usanıb, dəyişiklik istəyir. Ona görə də hökumət heç bir etiraza razı olmur. Bilir ki, bir etiraza razılaşsa bu, rejimin sonu olacaq.