11 gündür aclıq edən jurnalist ABŞ prezidentinə müraciət edəcəyini bildirib

Bakı/10.02.21/Turan: Xeberman.com və press-az.com saytlarının təsisçisi, həbsdə olan Polad Aslanov 11 gündür aclıq edir.

Fevralın 10-da o, xanımı ilə telefon əlaqəsi saxlayıb. Jurnalistin xanımı Gülmirə Aslanova “Amerikanın səsi”nə müsahibəsində bildirib ki, Polad Aslanov ədalətsiz və qanunsuz məhkəmə hökmünə etiraz olaraq aclığı davam etdirir.

“Polad səhhəti ilə bağlı problemin olmadığını, yalnlız mədəsində bir balaca ağrıların olduğunu bildirdi. Dedi ki, səhhəti hazırda qənaətbəxşdir. Ona Ombudsman Aparatından baş çəkdiklərini dedi. Tibbi mərkəzə köçürülməsi və həkim nəzarətinə götürülməsi üçün və Səbinə Əliyevanın (ombudsman-red.) adınamüraciət yazıb.  Ombudsma Aparatından həkimlə birgə ona baş çəkiblər. Həkim Polada aclığı dayandırmağı məsləhət bilib. Polad aclığı davam etməkdə israrlı olduğunu deyib.

Polad Aslanov həbs yerində aclıq etdiyinə görə hər hansı təzyiqə məruuz qalmadığını deyib.

Amma hələ də təcridxananın həkimi ona baş çəkməyib, təzyiqini belə ölçməyib. Polad dedi ki, jurnalist fəaliyyətinə görə şərlənərək həbs edilib. Sağlamlığı imkan verənədək, sonunadək aclığı davam etdirəcək. Hüquqlarını qanun çərçivəsində bərpa edəcəyini bildirdi.

Polad Aslanov deyib ki, Azərbaycanda müraciət etmədiyi orqan qalmayıb və onun müraciətlərinə cavab verilməyib.  Bildirdi ki, daha Azərbaycandan yox, Amerikadan kömək gözləyir. Polad dedi ki, Amerika prezidenti Co Baydenə məktub yazacaq, qanunsuzluq üçün, hüquqlarının bərpası üçün ondan kömək istəyəcək. Həmin məktubu növbəti məhkəmə iclasında ictimaiyyətə təqdim edəcək”, - Gülmirə Aslanova bildirib.

O deyib  ki, Polad Aslanovun aclıq aksiyasına yalnız Ombudsman Aparatı münasibət bildirib.

“Rəsmi qurumlar aclıq aksiyasına münasibət bildirməyiblər. Polad qida qəbul edən digər məhbus yoldaşı ilə birlikdə eyni kamerada saxlanılır. Ürək-damar xəstəsidir və qan azlığından əziyyət çəkir. 1 saylı Bakı İstintaq Təcridxanasının rəisi Elnur İsmayılov mənə bildirdi ki, birmənalı olaraq Polad Aslanovun aclıq aksiyası protokollaşdırılmayacaq. Baxmayaraq ki, Polad Aslanov aclığa başlaması ilə bağlı təcridxananın rəisinə və Bakı Apellyasiya Mərkəməsinin hakimi, jurnalistin məhkəməsinə sədrlik edən Həsən Əhmədova rəsmi müraciət edib”, - G. Aslanova deyib.

O, Polad Aslanovun müdafiəsilə bağlı beynəlxalq təşkilatların dəstək verdiyini deyib.

Jurnalistlərin Müdafiə Təşkilatı, “Sərhədsiz Reportyorlar” təşkilatı, eləcə də ABŞ Dövlət Departamentinin demokratiya, insan hüquqları və əmək məsələləri bürosu Azərbaycan hökumətindən Polad Aslanovun azad edilməsini istəyib. Nəinki Poladın, bütün jurnalistlərin azad edilməsini Azərbaycan hökumətindən tələb edib.

Jurnalsitin xanımı fevralın 9-da  ABŞ-ın Azərbaycandakı səfirliyinin qarşısında da etiraz aksiyası keçirdiklərini bildirib: “Səfirliyin nümayəndəsi bizim qarşımıza çıxdı, əlimizdəki banerlərdəki şüarları qeyd etdi. Orada jurnalistlərin və  bütün siyasi məhbusları azad edilməsi  tələbi yazılmışdı. Səfirliyin nümayəndəsi polis əməkdaşlarına tapşırdı ki, biz sivil qaydada aksiya edirik, bizə toxunmasınlar. Nümayəndə səfirliyə daxil olandan sonra polis əməkdaşları biziz kobud şəkildə itələyərək oradan uzaqlaşdırdı”.

Onun dediklərinə görə, ABŞ səfirliyi Polad Aslanovun məsələsini nəzarətə götürüb, daim onun ailəsi ilə əlaqə saxlayır. 

Fevralın 8-də Ombudsman Aparatının nümayəndələri 1 saylı Bakı İstintaq Təcridxanasında Polad Aslanov ilə görüşüblər.

Ombudsman Aparatının nümayəndəsi Polad Aslanovun aclıq etdiyini təsdiqləyib. Bununla yanaşı, qurumda qeyd ediblər ki, Polad Aslanovun vəziyyəti normaldır, sərbəst hərəkət edir, lakin Bakı Ağır Cinayətlər Məhkəməsinin ədalətsiz hökmündən şikayətçidir.

Ombudsman Aparatının əməkdaşı “Amerikanın səsi”nə deyib ki, P.Aslanov adi kamerada qalır və digər məhbuslardan təcrid edilməyib. Eyni zamanda, Ombudsman Aparatının nümayəndəsinin sözlərinə görə, ona tibbi nəzarət var.

Penitensiar Xidmətdən hələ Polad Aslanovla bağlı hər hansı məlumat almaq mümkün olmayıb.   

2020-ci il noyabrın 16-da Bakı Ağır Cinayətlər Məhkəməsi (hakim Faiq Qəniyevin sədrliyilə) Polad Aslanovu 16 il azadlıqdan məhrum edib.

Dövlət Təhlükəsizliyi Xidmətinin məlumatına görə, Polad Aslanov Cinayət Məcəlləsinin 274-cü (dövlətə xəyanət) maddəsi ilə ittiham olunur.

Açıqlamada onun xarici xüsusi xidmət orqanlarının əməkdaşlarından aldığı tapşırıqlar əsasında Azərbaycanın dövlət təhlükəsizliyi və müdafiə qabiliyyəti zərərinə istifadə etməkdən ötrü topladığı məlumatları həmin orqanlara ötürdüyü bildirilir.

Polad Aslanov məhkəmədə ittihamı qəbul etmədiyini və həbsinin jurnalist fəaliyyəti ilə bağlı olduğunu bildirib.

ABŞ Dövlət Departamentinin Demokratiya, İnsan Hüquqları və Əmək Məsələləri Bürosunun ötən il noyabrın 2-də yaydığı bəyanatda Azərbaycan hakimiyyəti 2019-cu ilin iyunundan  Dövlət Təhlükəsizliyi Xidmətindəki korrupsiyanı ifşa etdikdən sonra tutulan Polad Aslanov da daxil olmaqla, əsas azadlıqlardan istifadə etdiyinə görə həbs edilən bütün jurnalistlərin sərbəst buraxılmasına çağırılır.

“Sərhədsiz Reportyorlar” beynəlxalq hüquq müdafiə təşkilatı Azərbaycan hakimiyyətini jurnalist Polad Aslanovla qeyri-insani rəftara son qoymağa, ona tibbi yardım göstərməyə və fevralın 15-də Bakı Apellyasiya Məhkəməsində ədalətli təhqiqatı təmin etməyə çağırıb.

“19 aylıq həbsdən, ədalətli məhkəmə təhqiqatı və ev dustaqlığına keçirilmə tələbi ilə keçirdiyi aclıq aksiyasından sonra Polad Aslanovun səhhəti pisləşib. O, həddindən artıq arıqlayıb və böyrəklərindəki ağrılardan şikayət edir, həyat yoldaşı ona həkim nəzarətinin olmadığını bildirir”, -  bəyanatda qeyd edilir.

2021-ci il fevralın 1-də Polad Aslanovun apellyasiya şikayətinə baxış başlayıb.

Jurnalist məhkəmədə prosesin obyektivliyinin təmin olunmasını tələb edərək aclıq elan edib.-03-