13 saylı Cəzaçəkmə Müəssisəsində aclıq aksiyasının iştirakçıları tibb müəssisəsinə köçürüldü

Bakı/14.05.21/Turan: Penitensiar Xidmətinin 6 saylı cəzaçəkmə müəssisəsində artıq 4 gündür aclıq aksiyasını keçirən məhkumlardan iki nəfərini mayın 13-də Müalicə müəssisəsinə köçürüldüyü bildirilir.

Bu barədə AzadlıqRadiosuna keçmiş siyasi məhbus, Azərbaycan Xalq Cəbhəsi Partiyasının üzvü Babək Həsənov bildirib.

Onun sözlərinə görə poçt göndərişlərinin dayandırılmasına etiraz olaraq aclıq aksiyasını keçirən iki məhkum Məmmədli Bəhruz və Allahverdiyev Vəli əliqandallı halda müəssisədən Müalicə Müəssisəsinə aparılıb. «Hər iki məhkum sağlam olduğu halda tibb müəssisəsinə köçürülmələri, xüsusilə də bunun aclıq aksiyası keçirdikdən sonra baş verməsi məndə əsaslı şübhələr yaradır. Hesab edirəm ki, məhkumların ailələri ilə əlaqə yaradılmasına imkan verilməməsi onlara verilən işgəncə izlərinin itirilməsinə hesablanmış vaxt uduşudur».

Vəli Allahverdiyevin anası Telnaz Allahverdiyeva AzadlıqRadiosuna oğlunun Müalicə Müəssisəsinə aparılması ilə bağlı məlumatı təsdiqləyib. «Bu gün axşam getdim «kalona». Mənə məlumat verildi ki, Vəli Müalicə müəssisəsindədir. Getdim ora, amma axşam saat 7 olduğuna görə artıq qapı bağlanmışdı. Oradan yenidən getdim cəzaçəkmə müəssisəsinə».

Allahverdiyevanın sözlərinə görə, cəzaçəkmə müəssisəsindən ona oğlunun qızdırması qalxdığına görə Müalicə müəssisəsinə aparıldığını dedilər. «Dedilər ki, qızdırması 37-dən bir az yüksək olduğu üçün aparıblar xəstəxanaya. Amma mən səhər oğlumla danışmışam, o mənə qızdırması olduğu barədə heç nə deməyib. Əksinə, məndən bu gün gəlib-gəlməyəcəyimi soruşdu».

Telnaz Allahverdiyeva qeyd edib ki, xahiş etsə də oğlu ilə telefonla danışmağa imkan verməyiblər. «Deyiblər ki, yaxma götürəcəyik, nəticə çıxan kimi sizə də onunla danışmağa imkan yaradacayıq. Test neqativ olsa, qaytaracayıq cəzaçəkmə müəssisəsinə. Mən isə dedim ki, mənə oğlumla əlaqə yaratmağa imkan verilməyənə qədər hər gün gələcəm».

Allahverdiyeva həmçinin oğlunun aclıq etmədiyini da deyib.

Bəhruz Məmmədlinin yaxınları da AzadlıqRadiosuna bildirib ki, onun Müalicə müəssisəsinə köçürüldüyü barədə onlara dostları tərəfdən məlumat verilsə də, məsələni hələ ki, dəqiqləşdirə bilmədilər.

Məsələ ilə bağlı Penitensiar Xidmətindən münasibət öyrənmək mümkün olmayıb.--0--