Azərbaycan Xarici İşlər Nazirliyinin Ermənistan-Azərbaycan sərhədində vəziyyətlə bağlı şərhi

Bakı/14.05.21/Turan: Hava şəraitinin yaxşılaşması ilə Azərbaycan sərhəd qüvvələri Ermənistanla həmsərhəd olan Laçın və Kəlbəcər rayonlarına yerləşdirilir. Sərhəd mühafizə sisteminin gücləndirilməsi tədbirləri Ermənistan və Azərbaycan arasında sərhəd xəttini müəyyən edən və tərəflərdə olan xəritələr əsasında aparılır. Bu barədə Azərbaycan Xarici İşlər Nazirliyinin Azərbaycanın Laçın rayonu və Ermənistanın Sünik vilayətinin sərhədində yerləşən Qaragöl gölü ətrafında vəziyyətin gərginləşməsi ilə bağlı şərhində deyilir.

Müstəqilliyini bərpa etdiyi vaxtdan etibarən iki dövlət arasında dövlət sərhədi olmayıb və bu səbəbdən hazırda “tərəflərin fikir ayrılığı ilə” müşayiət olunan qəliz texniki prosesdən söz gedir.

“Bu proseslə bağlı Ermənistan tərəfinin qeyri-adekvat reaksiya verərək, təxribat xarakterli bəyanatlarla çıxış etməsi təəccüb doğurur”.

Mayın 12-də Azərbaycan Sərhəd Xidmətinin rəhbərliyi əraziyə ezam olunub, Ermənistan tərəfi ilə danışıqlar aparılır, vəziyyətin normallaşması istiqamətində müvafiq addımlar atılır.

“Ermənistanın siyasi-hərbi dairələrinə təşvişə düşməməyi, Azərbaycanın Zəngilan, Qubadlı, Laçın və Kəlbəcər rayonları boyunca dövlətlərarası sərhəd rejimi reallığını qəbul etməyi və əsassız olaraq bölgədə vəziyyəti gərginləşdirməməyi tövsiyə edirik. Bu kimi hallar hər iki tərəfdən hərbçilər arasında qarşılıqlı təmaslar vasitəsilə müzakirə olunaraq, həll oluna bilər və olunmalıdır.

Azərbaycan öz tərəfindən, qeyd olunan bölgədə gərginliyin aradan qaldırılmasına sadiqdir və bu istiqamətində müvafiq addımların atılmasına çağırır", deyə Azərbaycan Xarici İşlər Nazirliyinin bəyanatında bildirilir. -02D-