Media-icmal 14.05.21

Ermənistanla sərhədlərin dəqiqləşdirilməsi prosesində mübahisələr, sənədsiz evlərin gələcək taleyi və s. medianın aparıcı mövzuları sırasındadır... 

“Yenisabah.az” saytında “Qaragöldə nə baş verir? - Eyni proses Qazaxda, Kəlbəcərdə də olacaq” sərlövhəli məqalədə bu günlərdə Azərbaycan-Ermənistan sərhədində baş verənlər şərh edilir.

Erməni mətbuatı bir neçə gündür ki, “Qaragöl” adlanan ərazinin tamamilə Azərbaycanın nəzarətinə keçdiyini bildirir və bundan narahatlıq ifadə edir. Eyni zamanda vurğulanır ki, buna qədər erməni mətbuatı Ermənistanın Sisyan şəhəri yaxınlığında İşxanasir dağlıq ərazisində Azərbaycan hərbi qüvvələrinin Ermənistanın “dövlət sərhədi”ndən 3 kilometr irəli keçdiyini iddia edirdi.

Emənistanın baş nazir vəzifəsini icra edən Nikol Paşinyan Təhlükəsizlik

Şurasının iclasını çağırır, digər tərəfdən Azərbaycanın Qaragöl gölü üzərində nəzarəti ələ keçirməyə səy etdiyini bildirir.

Mövcud durumu şərh edən politoloq Qabil Hüseynli Ermənistanın hay-küyünü əsassız sayır və Azərbaycan-Ermənistan arasında sərhədlərin delimitasiyası, daha sonra isə demarkasiyasının aparıldığını bildirir. Onun sözlərinə görə, sərhədlər sovet dövrü xəritələrilə müəyyən edilir və sonra təsdiqlənir.  

Həmin xəritələrə əsasən, Azərbaycan Zəngəzurdakı və Göyçə gölü ətrafındakı torpaqları qaytarmaq üçün əməliyyatlar keçirir: “Eyni proseslər Qazaxda da, ola bilsin ki, Kəlbəcərdə də baş verə bilər, çünki vaxtilə ermənilər Azərbaycan sərhədlərini pozublar, indi bu səbəbdən sərhədlərin dəqiqləşdirilməsi prosesində hay-küylü mübahisələr yaranır.  

“Yeniavaz.com” saytında “Sənədsiz evlərə niyə çarə tapılmır?” sərlövhəli məqalədə verilən suala cavab axtarılır.

Paytaxt Bakıda təxminən yarım milyon civarında sənədsiz ev olduğu deyilir, həm də əlavə edilir ki, bu məsələ hələ də həllini tapmayıb. Əmlak Məsələləri üzrə Dövlət Xidmətinə müraciətlər olsa da, suallar cavablandırılmayıb. 

Sakinlərin sözlərinə görə, bu məsələnin həllilə bağlı aidiyyatı qurumlar evlərin çıxarışı barədə heç bir məlumat vermir, təkcə bunu bildirirlər ki, sənədsiz evlər hökumətin nəzarətindədir.

Bu evlərlə bağlı 2010-cu və 2015-ci ildə məsələ qaldırılsa da, paytaxt üçün sosial problemə çevrildiyi deyilsə də, məsələ həllini tapmayıb. 

2019-cu ildə məsələnin həlli üçün Bakının rayonları üzrə komissiyalar yaradıldı, amma indiyə kimi bu komissiyaların hansı işi yerinə yetirdikləri məlum deyil.

Komissiyadan bildirirlər ki, COVİD-19 pandemiyası ilə bağlı fəaliyyət göstərmirlər. Hansı evlərin sökləcəyinin, hansılarının sökülməyəcəyinin müəyyən olunması prosesi gedir.

Su, neft-qaz magistral kəmərləri üzərində, yüksək gərginlikli elektirk xətləri altında, dəmiryolu nəqliyyatının təhlükəsizlik zolaqlarında, neft mədənlərində və s. tikilmiş evlər söküləcək, amma kompensasiya ödənilməyəcək. 

“Modern.az” saytında “Ermənistan-Azərbaycan gərginliyi: Bizə aid olanların hamısını geri qaytaracağıq!” sərlövhəli məqalədə Azərbaycan-Ermənistan gərginliyi və onun səbəbləri müzakirə edilir.

Siyasi ekspertlərə görə, Azərbaycan torpaqlarını uzun illər işğalda saxlayan Ermənistan  bunun belə davam edəcəyi düşüncəsilə torpaqların bir hissəsini öz ərazilərinə birləşdirmişdi.

Politoloqlar deyirlər ki, Azərbaycan işğala son qoyub və indi Ermənistanla sərhədlərini müəyyənləşdirir, amma ermənilərin dövlətçilik anlayışı olmadığı üçün haray-həşir salırlar.

Ekspertlər vurğulayırlar ki, Ermənistan Azərbaycana təsir göstərilməsi üçün Kremli də dövrəyə qoşmaq istəyir, çünki sərhədlərin müəyyn olunmasını “Ermənistan ərazilərinin qəsb edilməsi” kimi başa düşür.

Mayın 11-də Azərbaycandan gedən RF xarici işlər naziri Lavrovun bu məsələ ilə bağlı mayın 13-də Azərbaycan XİN rəhbəri Ceyhun Bayramova zəng etməsi göstərir ki, Ermənistanın vəziyyəti ciddiləşib.

Politoloqa görə, Lavrova təsir edən həm də odur ki, gərginlik artırsa, deməli, nazirin bölgəyə səfəri nəticə verməyib: “Lavrov Azərbaycana səfər etdi deyə biz öz haqlarımızdan imtina edəsi deyilik, əksinə Moskvaya anlatmalıyıq ki, bizə aid olanların hamısını geri qaytaracağıq. Torpaq məsələsində güzəşt ola bilməz”, deyə politoloq bildirir.