15 yanvar hava proqnozu

Milli Hidrometeorologiya Xidmətinin məlumatına görə, Bakıda və Abşeron yarımadasında yanvarın 15-də hava əsasən dəyişkən buludlu, ara-sıra tutulmalı, ümumən yağmursuz keçəcək. Lakin gecə və səhər saatlarında bəzi yerlərdə çiskin müşahidə oluna bilər.

Gecə mülayim şimal-qərb küləyi əsəcək, gündüz isə bu külək şimal-şərq küləyi ilə əvəz olunacaq. Paytaxtda temperaturun gecə 3°C-dən 5°C-dək, gündüz isə 6°C-dən 8°C-dək dəyişəcəyi gözlənilir. Atmosfer təzyiqi normadan yüksək olaraq 769 mm civə sütunu təşkil edəcək, nisbi rütubət isə 70-80% olacaq.

Azərbaycanın digər rayonlarında da əsasən yağmursuz hava gözlənilir. Lakin bəzi şərq bölgələrində ara-sıra yağıntı, o cümlədən qar proqnozlaşdırılır. Ayrı-ayrı yerlərdə duman müşahidə edilə bilər, qərb küləyi üstünlük təşkil edəcək.

Rayonlarda temperaturun gecə -2°C-dən 3°C-dək, gündüz isə 6°C-dən 10°C-dək dəyişəcəyi gözlənilir. Dağlıq ərazilərdə isə gecə -3°C-dən -8°C-dək şaxta, gündüz isə 3°C-dən 7°C-dək isti müşahidə ediləcək.