1600-dən çox Azərbaycan vətəndaşı Ukraynanı tərk edib

Bakı/01.03.22/Turan: Fevralın 28-i axşama olan məlumata görə,  Ukraynada hərbi əməliyyatlar başlayandan bəri 1600-dən çox Azərbaycan vətəndaşı bu ölkəni tərk edib.

Azərbaycan Xarici İşlər Nazirliyinin məlumatında deyilir ki, 950 nəfər Azərbaycan vətəndaşı Moldovaya, 447 nəfər Polşaya, 17 nəfər Macarıstana, 200 nəfər Rumıniyaya, 13 nəfər Slovakiyaya gedib.

Həmin ölkələr Azərbaycan vətəndaşlarını sonradan Bakıya getmələri üçün müvəqqəti olaraq qəbul edirlər.

Azərbaycan vətəndaşlarının Ukraynadan təxliyəsi davam edir.

Qeyd edək ki, ötən gecə Ukraynadan təxliyə edilmiş 176 Azərbaycan vətəndaşı Azərbaycan Hava Yollarının xüsusi reysilə Rumıniyadan Bakıya gətirilib.

Öz növbəsində Azərbaycanın Ukraynadakı səfirliyi bu ölkədə hərbi əməliyyatlar nəticəsində azərbaycanlıların həlak olması şəraitinin təfərrüatlarını açıqlayıb.

“Fevralın 27-də saat 02:00 radələrində Ukrayna ərazisində davam edən hərbi münaqişə ilə əlaqədar öz təşəbbüsü ilə Odessa vilayətindən Moldovaya təxliyə olmağa çalışan azərbaycanlıların olduğu 8 avtomobildən ibarət kolon tanınmamış Dnestryanı Respublikasının yaxınlığındakı “Kuçurqan” keçid məntəqəsinin yanında naməlum şəxslər tərəfindən odlu silahdan atəşə tutulub”, - səfirliyin bəyanatında deyilir.

Atəş nəticəsində Azərbaycan vətəndaşları Nemət İsmayılov (1976-cı ildə anadan olub), Rəhim İsmayılov (1966-cı ildə anadan olub) və Qabil İsmayılov (1995-ci il) həlak olublar.

"Həlak olanların qohumlarının sözlərinə görə, daha dörd nəfər Azərbaycan vətəndaşı yaralanıb. Hadisə yerinə Ukrayna polisi gəlib, cəsədlər morqa aparılıb, xəsarət alanlar isə xəstəxanaya yerləşdirilib. Yaralananların vəziyyətinin qənaətbəxş olduğu bildirilir",- səfirliyin məlumatında qeyd olunur. Yaralıların soyadları açıqlanmır.

Bundan əlavə, fevralın 27-də səhər saat 9:00-a yaxın Xarkovun mərkəzində sakit şəraitdə küçəyə su almaq üçün çıxan Azərbaycan vətəndaşı Qoşqar Məmmədov (1987-ci ildə anadan olub) naməlum istiqamətdən açılan güllədən həlak olub.

"Yaranmış vəziyyətlə əlaqədar ilk fürsətdə həlak olanların cəsədlərinin Azərbaycana göndərilməsi planlaşdırılır", - məlumatda deyilir.

Səfirlik Ukraynanın müxtəlif regionlarında təhlükəsizliklə bağlı gərgin vəziyyəti nəzərə alaraq, Azərbaycan vətəndaşlarına yaşadıqları yerlərdə qalmağı, komendant saatının tələblərinə riayət etməyi, hərbi obyektlərdən və aktiv hərəkətlərin baş verdiyi yerlərdən uzaq durmağı, yalnız son dərəcə zəruri hallarda öz yerlərini tərk etməyi, həmçinin vəziyyətlə bağlı Ukraynanın dövlət strukturlarının, Azərbaycan Xarici İşlər Nazirliyinin və Kiyevdəki diplomatik missiyanın məlumatlarını izləməyi tövsiyə edir.—06В-