5 saatdan sonra internetə çıxış bərpa edilib

Ölkədə internet əlaqəsi bərpa edilib, bank sektoru, dövlət qurumları və s. sahələrdə internet vasitəsilə göstərilən xidmətlərin fəaliyyəti, o cümlədən fərdi istifadəçilər tərəfindən istifadə təmin olunub. Bu haqda Rabitə və Yüksək Texnologiyalar Nazirliyinin (RYTN) mətbuat xidməti dünən ölkədə internetə çıxışla bağlı yaydığı açıqlamada deyilir.

Bununla yanaşı, hadisənin fəsadlarının aradan qaldırılması üzrə tamamlama işlərinin davam etdiyi də nəzərə çatdırılır.

Açıqlmaya görə, noyabrın 16-sı saat 16.00 radələrində ölkənin qlobal internet şəbəkəsilə əlaqəsini təmin edən milli operator – “Delta-Telekom” MMM Data Mərkəzinin əsas kabellərinin birində tüstülənmə olub. Hadisə zamanı açıq yanğın halları baş verməyib, kabellərin əriməsi nəticəsində yaranan tüstü avadanlıqda qismən nasazlıq yaradıb. Bununla bağlı sistemin ümumi işi dayandırıldığına görə ölkədə internetə çıxışda kəsinti yaranıb.

Hadisə zamanı ölkənin tranzit marşrutu üzrə fəaliyyətdə heç bir fasilə baş verməyib, normal xidmət göstərilməsi davam edib. Digər operatorların alternativ kanalları hesabına ölkədə internet əlaqəsi mövcud olub, bu imkanlardan rabitənin təşkili üçün istifadə edilib.

Nazirlik, eləcə də aidiyyəti rəsmi qurum təmsilçiləri hadisə yerində olub. Baş verən tüstülənmə təxirəsalınmaz işlərə başlamağa maneə yaratdığı üçün internet əlaqəsinin bərpası vaxt tələb edib. 5 saat çəkən bərpa işlərindən sonra saat 21.00 radələrində internet əlaqəsi bərpa olunub. -05D-