57 saylı köşkün işi KİV-in diqqət mərkəzindədir

57 saylı qəzet köşkü bazar ertəsi yenidən son üç gündə bu pərakəndə satış nöqtəsinə böyük diqqət yetirən mətbuatın diqqət mərkəzində olub. 

Media Mərkəzdə keçirilən mətbuat konfransında köşkdə qəzet satıcısı olan Kamran Hüseynov başına gələnlər barədə danışıb. “Artıq bir neçə həftədir özlərini Bakı şəhər İcra Hakimiyyətinin ticarət departamentinin əməkdaşları kimi təqdim edən şəxslər məni sıxışdırır. Onlar yeni köşk qurmaq üçün köşkü tərk etməyimi tələb edirlər”.

Lakin Hüseynovun özünə yeni köşkdə iş təklif olunmur və bununla da üç uşaqlı ailə başçısını küçəyə atırlar.

Hüseynovun əməkdaşı olduğu QASİD dövlət şirkəti heç bir şəkildə müdaxilə etmir və səssizcə paytaxtın mərkəzində öz köşklər şəbəkəsinin dağıdılmasını müşahidə edir. Bu firma artıq köşklərin demək olar ki, yarısını itirib və bu gün iki yüzdən çox acınacaqlı vəziyyətdədir.

Turan agentliyində olan məlumata görə, yarım il əvvəl paytaxt meri Hacıbala Abutalıbov QASİD direktoruna şifahi xəbərdarlıq edib ki, paytaxtda qəzet köşklərinin yerinə yeni, “Paris köşklərini” xatırladan qəzet köşkləri qurulacaq. Son 1,5 ayda gecə saatlarında şəhərin mərkəzində 40-dan çox köşk sökülüb. Heç kim köşklərin dəyişdirilməsi haqqında meriyanın rəsmi qərarlarını təqdim etməyib.

“Azadlıq” qəzetinin redaktoru Rəhim Hacıbəyli Turan-a bildirib ki, yeni köşklər qəzetdən başqa nə desən satır: “Bizim və digər qəzetlərin pərakəndə satışı kəskin şəkildə azalıb və biz ziyan çəkirik”.

Yalnız son yarım ildə QASİD-in “Azadlıq” qəzetinə satdığı qəzetlərə görə 25 min manat borcu yaranıb. Digər nəşrlərdə də vəziyyət eynidir. Şirkət etiraf edib ki, belə bir problem var və köşklərin dəyişdirilməsi prosesi ilə bağlıdır.

Yeni köşklərin sahibləri qəzet satışında maraqlı deyillər, belə ki, qida məhsulları və içki, hətta spirtli içkilər satır. Qeyri-rəsmi məlumatlara görə, hər bir köşk sahibi 2-3 min manat pay ödəyir. Buna görə, böyük gəlir verməyən dövri mətbuatı satmaq onlar üçün sərfəli deyil.

Həm də köşk sahiblərinə reklamdan gəliri olmayan, pərakəndə satışdan asılı olan müstəqil qəzetləri az satmaq tapşırılır.

Araşdırmalar göstərir ki, Azərbaycan adambaşına düşən köşklərin sayına görə son yerlərdən birini tutur. Məsələn, Avropa ölkələrində hər 2 min nəfərə bir köşk düşür, Azərbaycanda isə 12 min nəfərə bir köşk düşür. Bu göstəricinin daha betər olduğu yerlər var, məsələn, şəhərkənarı Buzovna qəsəbəsində 50 min nəfərə cəmi bir köşk düşür.

Mətbuat konfransında pərakəndə qəzet satışı bazarının müdafiəsi üzrə kampaniyaya başlamaq qərara alınıb. Bu məqsədlə KİV və jurnalist təşkilatlarının bir qrup nümayəndəsi QASİD rəhbərliyi, Bakı meriyası, ölkənin prezident administrasiyası ilə görüşlər keçirmək niyyətindədir.

Vəkil Fuad Ağayev 57 saylı köşkün işi üzrə məhkəmədə çıxış etməyə hazır olduğunu bildirib, jurnalistlər də öz araşdırmalarını aparacaqlar. -0-