600-dən çox fəal Mehman Hüseynovu azad etməyə çağırdı

Bakı/12.04.17/Turan: Reportyorların Azadlıq və Təhlükəsizlik İnstitutunun (RATİ) rəhbəri, bloger Mehman Hüseynovun azad edilməsi tələbi yer alan ərizəni 600-dən çox siyasi fəal və vətəndaş fəalı, jurnalist, siyasətçi və ictimai xadim imzalayıb.

Onlar M.Hüseynovun “siyasi sifarişlə” cəzalandırılmasını, iki il müddətinə azadlıqdan məhrum edilməsini qətiyyətlə pisləyiblər və Azərbaycan hakimiyyətini onu dərhal azad etməyə çağırıblar.

Onlar hesab edirlər ki, M.Hüseynovun azadlıqdan məhrum edilməsi onun hüquq müdafiə və blogerlik fəaliyyəti ilə bağlıdır.

Bəyanat müəllifləri hesab edirlər ki, M.Hüseynovun həbsinin səbəbi onun polis tərəfindən ona verilən işgəncələri ictimailəşdirməsi, habelə Azərbaycan prezidenti İlham Əliyevin həyat yoldaşı Mehriban Əliyevanı birinci vitse-prezident təyin etməsi haqqında satirik reportajı səbəb olub.

Bəyanatda həmçinin xatırladılır ki, Mehman Hüseynov daha çox Azərbaycanda yüksək vəzifəli məmurların qanunsuz yollarla əldə etdikləri əmlaklar barəsində və dövlət satınalmalarında korrupsiya halları haqqında çoxsaylı reportajların müəllifidir.Həmin reportajlar sosial şəbəkələrdə çox məhşur olan “Sancaq” onlayn satirik ictimai-siyasi jurnalında yayımlanır vəonları gündəlik 100 minlərlə insan izləyir.

Mehman Hüseynov 2016-cı ilin noyabırından etibarən RATİ-nin sədri vəzifəsini icra edir. 2014-cü ildən bu günədək RATİ  digər müstəqil yerli və beynəlxalq QHT-lər kimi Azərbaycan hakimiyyətin təqibi ilə üz-üzə qalmaqdadır. Belə ki, təşkilatın həmtəsisçisi Emin Hüseynov həbs təhlükəsi iləüzləşdiyi üçün İsveçrənin Azərbaycandakı səfirliyində 10 ay gizləndikdən sonra, İsveçrəyə siyasi mühacirətəgetməyə məcbur olub. Emin Hüseynovu sədr vəzifəsində əvəzləyən jurnalist həmkarı Rasim Əliyev 2015-ci ilin avqustunda döyülərək öldürülüb.  

Bəyanatda o da qeyd edilir ki, M.Hüseynovun həbsindən bir qədər əvvəl Milli Məclisin hakim partiyadan olan deputatları dəfələrlə ona qarşı ölçü götürülməsi və internetdə ifadə azadlığını məhdudlaşdıran yeni qanunların qəbulu üçün çağırışlar ediblər.   

Hələ 2012-ci ildə “Demokratiya üçün oxu” kampaniyasındakı media ilə əlaqələdirici koordinator fəaliyyətinə görə M.Hüseynov barəsində cinayət işi açılıb və ölkədən çıxışına qadağa qoyulub. 2014-cü ilin noyabrında şəxsiyyət vəsiqəsini yeniləyərkən polis tərəfindən növbəti dəfə saxlanılıb və onun adına olan pasport və şəxsiyyət vəsiqəsi ləğv edilib və o, indiyədək bu sənədləri ala bilməyib.

Nəhayət, uzun sürən təzyiq və təqibdən sonra, 3 mart 2017-ci il tarixində Azərbaycan iqtidarı Mehman Hüseynovu diffamasiyaya görə qanunsuz olaraq 2 il müddətinə azadlıqdan məhrumetmə cəzasına məhkum edib. 

Bəyanat müəllifləri Apellyasiya Məhkəməsini Hüseynova bəraət verməyə çağırır, habelə qanunverici və icra hakimiyyətlərinin yüksək vəzifəli nümayəndələrinə tənqidə qarşı dözümlü olmaq və fundamental azadlıqlara hörmət etmək çağırışı ilə müraciə edirlər.

Bəyanatı 656 nəfər imzalayıb. -06D-