9 ayda narkotik ilə bağlı 1800 nəfər cinayət məsuliyyətinə cəlb edilib

Bu ilin 9 ayı ərzində hüquq-mühafizə orqanları qanunsuz narkotik maddə dövriyyəsinə dair 2628 fakt aşkar edib. Bu barədə Narkomanlığa və Narkotik Vasitələrin Qanusuz Dövriyyəsinə qarşı Mübarizə Komissiyası bildirir.

1687 fakt bu vasitələrin satış məqsədi olmadan əldə edilməsilə bağlıdır. 

667 fakt isə satış məqsədilə qanunsuz olaraq narkotik vasitələri əldə etməklə bağlı olub. Bütünlükdə bu müddət ərzində dövriyyədən ümumi çəkisi 1 ton 962 kq 680,957 qr müxtəlif növ narkotik vasitələr və o cümlədən 21482 ədəd çətənə kolu müsadirə edilib. Bu müsadirə edilən narkotik vasitələrin 1ton 200 kq-dan çoxu (60%) heroin tərkiblidir.

Xəbərdə deyilir ki, “Xaş-Xaş -2016” şərti adı altında həyata keçirilən tədbirlər nəticəsində qəsdən əkilib-becərilən və yabanı halda bitən 146 tondan çox narkotik tərkibli bitkilər yaşıl kütlə halında məhv edilib.

Bu məsələ ilə cinayət məsuliyyətinə 1800 nəfər cəlb edilib ki, bunun da 1378 nəfəri 30 yaşdan yuxarı, 1645 nəfəri işsiz, 1772 nəfəri kişilərdir.

Komissiya Səhiyyə Nazirliyi Respublika Narkoloji Mərkəzinə istinadən 2015-ci Mərkəzdə 28.555 nəfərin qeydiyyatda olduğunu bildirir. Bunlardan 23.153 nəfər dispanser, 5.402 nəfər isə profilaktik qeydiyyatda olanlardır.

Səhiyyə Nazirliyi QİÇS-lə Mübarizə Mərkəzinin məlumatına əsasən 2016-cı ilin 9 ayı ərzində  Azərbaycanda İİV-ə yoluxması yeni aşkar olunan insanların sayı 374 nəfər təşkil edib ki, onlardan 365-i (97,5%) Azərbaycan vətəndaşı, 9-u (2,5%) isə əcnəbilərdir.

Azərbaycanda ilk dəfə İİV infeksiyasının aşkar olunduğu 1988-ci ildən 2016-cı ilin oktyabrına kimi Respublika QİÇS-lə Mübarizə Mərkəzində İİV infeksiyası təsdiq olunmuş 6003 nəfər qeydiyyata götürülüb ki, onlardan 5803-ü (97%) Azərbaycan vətəndaşı, 200-ü (3%) isə əcnəbidir, İİV-ə yoluxanların 4459-u (74,3%) kişi, 1544-ü (25%) qadındır.

Xatırladaq ki, komissiyanın sədri baş nazirin müavini Əli Həsənovdur. -0-