«Nardaran işi» üzrə məhkəmə prosesində gərginlik

Oktyabrın 14-də Bakı Ağır Cinayətlər Məhkəməsində “Müsəlman Birliyi” hərəkatının həbsdə olan sədri Taleh Bağırzadə, AXCP sədrinin müavini Fuad Qəhrəmanlı və digərlərinin növbəti məhkəmə iclası keçirilib.

Hakim Əlövsət Abbasovun sədrliyi ilə keçirilən prosesdə Taleh Bağırzadə çıxış edib. O, bildirib ki, Aşura günü onu saxlanıldığı Bakı İstintaq Təcridxanasında cərimə kamerasına salıblar: “Onlardan bunun səbəbini soruşanda dedilər ki, Yezid belə göstəriş verib. Bunun Penitensiar xidmətə dəxli yoxdur. Ötən iclasda mən Ramil Usubovla bağlı vəsatət verdim. Ramil Usubov mənim vəsatətimlə bağlı araşdırma aparmaq əvəzinə göstəriş verib ki, Talehi cəzalandırın. Bunların əlacı olsa bizim başımızı kəsib nizəyə vurub, gəzdirərlər. Sadəcə bilirlər ki, Azərbaycan xalqı Küfə camaatı deyil. Üç il əvvəl həbsdə olanda Bakı İstintaq Təcridxanasının keçmiş rəisi Azər Seyidov çıxışlarıma görə məni tez-tez cərimə kamerasına göndərirdi. Bir dəfə Aşura günü idi. Yenə cəzalandırmaq istəyirdi. Dedim göndər cərimə kamerasına. Dedi ki, Aşura günüdür olmaz, sonra deyərlər ki, yezidlik edirlər. Lakin Ramil Usubov deyir ki, əcəb edirik. Bu onun göstərişi ilə olub. Bunlar özlərin nə hesab edirlər? Bu yezidçilikdən əl çəksinlər”.

Daha sonra Hacı Taleh bildirib ki, zülm dəryasında 5 sutka, 5 damladır bizim üçün. “Onlar Mehriban Əliyevanı təhqir ediblər.Təhqir edən şəxsləri araşdırmaqdan, Ramin Usubov məni karsa saldıtdırır. Yəni demək istəyir ki, söymüşəm, əcəb eləmişəm “.

Daha sonra iclasda Sabunçu rayon Polis İdarəsinin əməkdaşı Nəsib Əsədullayev ifadə verib. O, bildirib ki, ötən il noyabrın 5-də bir qrup şəxs Sabunçu RPİ-nin qarşına yığışaraq Elçin Qasımovun azadlığa buraxılmasını tələb edib. O, hadisə zamanı xəsarət almadığını söyləyib.

 İclasda şahid qismində Sabunçu RPİ-nin əməkdaşı Anar İbrahimov da ifadə verib. O bildirib ki, hadisə zamanı dəyənəyi itib və qarnına daş dəyib. Lakin zərərçəkmiş kimi harasa müraciət etməyib.

 Məhkəmə prosesində çıxış edən Taleh Bağırzadə isə deyib ki, onlara dəstək olan hüququ müdafiəçilərini və siyasətçiləri “Bandotdel”ə çağrıb hədələyiblər: “Onlara deyiblər ki, bu cür cinayətkarları müdafiə etmək olmaz. Həbslə hədələyiblər. Biz bundan narahatıq”.

Hakim Əlövsət Abbasov isə deyib ki, həmin şəxslər Daxili İşlər Nazirliyinə şikayət edə bilərlər. Taleh Bağırzadə isə ona “Cəlladdan cəllada şikayət edək?” cavabını verib.

Vəkil Yalçın İmanov isə deyib ki, bu həm də vəkillərə təzyiqdir: “Həmin şəxslərə açıq şəkildə deyiblər ki, müdafiə etməyin, yoxsa həbs oluna bilərsiniz. Təqsirləndirilən şəxsləri biz də müdafiə edirik. Bu məhkəməyə təzyiq kimi başa düşülməlidir. Sabah vəkilləri də çağırıb deyə bilərlər ki, niyə müdafiə edirsiniz. Bu davranışlar qanundan kənardır”.

Abbas Hüseynov isə deyib ki, onlar vəsatət versələr də baxılmayıb: “Bizim başımıza gələnlərlə bağlı vəsatətlər verdik. Qardaşlarımı girov götürmüşdülər. Lakin baxan olmadı. Şeytanın, Yezidin balasından şeytana, yezidə şikayət edək? Nə ağır şeydir qələmi götürtüb yazmaq ki, ay banditlər bunları etməyin”.

Taleh Bağırzadə də onların işgəncə barədə olan vəsatətlərinə baxılmadığını deyib: “Dünən getmişdim Bakı Apellyasiya Məhkəməsinə. Orada hakim deyir ki, əgər sənin bu işgəncə barədə danışdıqların həqiqətdirsə, sənə bəraət verilməlidir. Bizə bu qədər işgəncə verilib. Guya nə etmisiniz ki?Bu gücdür bu xalqı belə vəziyyətdə saxlayan, Qarabağı işğalda saxlayan. Gücü var getsin erməniyə göstərsin” .

Daha sonra iclasda Sabunçu rayon Polis İdarəsinin əməkdşı İsrafil Mustafayev  ifadə verib. O, ötən il noyabrın 5-də polis idarəsinin qarşısına toplaşan adamları tanımadığını, hadisə zamanı xəsarət almadığını deyib.

Sabunçu rayon Polis İdarəsinin əməkdşı Siyavuş Mirzəzadə də iclasda dindirilib. O, ötən il noyabrın 5-də polis idarəsinin qarşısında baş verən hadisə zamanı idarədə növbədə olduğunu, heç kimi həbs etmədiyini deyib. Vəkil Yalçın İmanov isə onun ifadələrində ziddiyət olduğunu bildirib. Deyib ki, şahid istintaq zamanı ifadəsində bir nəfəri saxladığını deyib. Lakin şahid ziddiyətin səbəbini göstərə bilməyib.

Daha sonra iclasda hakim bildirib ki, Nardaran hadisələri zamanı dünyasını dəyişən Vüqar Nəsibov və İsmayıl Tağıyev adlı polis əməkdaşlarının hüquqi varisələri məhkəməyə müraciət edərək iclasda iştirak etmək istəmədiklərini söyləyiblər.

İclasda Baş Mütəşəkkil Cinayətkarlıqla Mübarizə İdarəsinin əməkdaşı İbrahim Kazımov isə vəkillərin və təqsirləndirilən şəxslərin suallarını cavablandırıb. Vəkil Yalçın İmanov ondan hər hansı ləqəbinin olub-olmamasını soruşub. İ. Kazımov ləqəbinin olmadığını deyib. Təqsirləndirilən şəxslərdən bir nəfər isə onun ləqəbinin “Şrek” olduğunu deyib. İ. Kazımov isə təqsirləndirilən şəxsi təhqir edib. Taleh Bağırzadə isə deyib ki, İ. Kazımovu ilk dəfə “Bandotdel”də zirzəmidə görüb. “Başınızda maska var idi. Lakin bədən quruluşunuzdan və səsinizdən bilirəm ki, siz idiniz. Mənə yuxarıda demişdilər ki, Nardaran hadisələrinin Milli Şura tərəfindən təşkil edildiyini denən. Mən də razı olmamışdım. Sən mənə dedin otur. Sonra dubinka ilə belimə, boynuma vurdun ki, yuxarıda sənə nə deyirlər et. Mən də dedim etməyəcəm. Ondan sonra da mənə və digər təqsirləndirilən şəxslərə işgəncə vermisən”, - deyə Bağırzadə bildirib.

İ. Kazımov isə heç kimə işgəncə vermədiyini deyib: “Elə bilirsiniz idarədə hündürboylu adam ancaq mənəm? Heç kimə əlim də dəyməyib. Qurana and içə bilərəm”.

Hakim isə deyib ki, şəriət məhkəməsi yaratmaq lazım deyil və müqəddəs kitaba and içmək qanunvericilkdə nəzərdə tutulmayıb: “Əgər İbrahim Kazımov istəsə göndərərəm təcridxanaya sizin yanınızda and içər”.

Taleh Bağırzadə isə deyib ki, İlham Əliyev də “Qurani Kərim”ə and içir: “Siz prezidenti şəriət ölkəsi qurmaqda ittiham edirsiniz?”

Hakim isə deyib ki, onun adn içməsi qanunvericilkdə o qaydada olsa da, məhkəmədə buna icazə verilmir.

Abbas Hüseynov ifadəsində bildirdi ki, “Bu şəxs yalan ifadə verir. O, işgəncə verdiyinə, qanunsuz həbs etdiyinə görə cinayət işi açılmalıdı. Hansı qanuna əsasən qardaşımı girov götürüb ona işgəncə veriblər?. Azərbaycan xalqı bilsin ki, “bandatdel” adında bir yer var, orada banditliklər məşğuldular. Hacı Məmmədovun davamçılarıdır. Bu şəxs Elman Bayramovun yanında məni iki saat dayanmadan yumruqla döyüb. Onlar bilirdi ki, mənim ürəyim xəstədi, amma onlar ürəyimə, gicgahıma vurudular”.

Daha sonra Cabbar Cabbarov çıxışı zamanı işgəncə verənlərin Kərim, Şahlar və İbrahimin olduğunu bildirdi. “ Bunların işgəncələrindən qorxmuram. Onlar məni podvala saldılar. Üzləri maskasız idi. Ondan qabaq məni möhkəm döymüşdülər. Mənə dedilər ki, bir avtomatdı da qol çək getsin. İbrahimə dedim işgəncələrlə bağlı Mehriban Əliyevaya məktub yazacam. Onlar başladı Mehriban Əliyevanı təhqir etməyə. Mənim əlim, qolum bağlı cinsiyyət orqanıma təpiklə vudular ki, mən razılaşım”.

Şahid isə Cabbar Cabbarova dedi ki, “O birilər dillənə bilər, amma sən yox”.

Abbas Hüseynov yenidən çıxış edərək bildirdi ki, “Bunlar mənə işgəncə verdilər, təhdid etdilər, qol çəkdirdilər mənə. İbrahim mənə dedi ki, mən burda 19 ildir ki, işləyirəm Burda lalında dilini açmışam.”

Lakin İ. Kazımov ittihamları rədd edib. Bu zaman təqsirləndirilən şəxslər onun üzünə tüpürüblər, ayyaqabı və su butulkası atıblar. İ. Kazımov da həmin ayaqqabını onlara tərəf atıb.

Sonda Hacı Taleh bildirdi ki, 19 ildir bu adamın orda əli qana batıb. Onun cəzasını o biri dünyada Allah verəcək. Jurnalistlərdən xahiş edirəm onun ləqəbini “Şrek” yox “Şümür” olaraq yazın”.

Poses oktyabrın 17-də davam edəcək.   –36С--