9 Mayla əlaqədar İkinci Dünya Müharibəsi veteranları maddi yardım alacaqlar

Bakı/20.04.18/Turan: Azərbaycan prezidenti İlham Əliyev aprelin 20-də faşizm üzərində Qələbənin 73-cü ildönümü ilə əlaqədar İkinci Dünya Müharibəsi veteranlarına birdəfəlik maddi yardım ödənilməsi haqqında sərəncam imzalayıb.

Sənədə əsasən, müharibə veteranlarının hər birinə 1000 manat (təxminən 600 dollar) ödəniləcək.

Bundan başqa, müharibədə həlak olmuş və ya sonradan vəfat etmiş döyüşçülərin dul arvadlarına, arxa cəbhədə fədakar əməyinə görə orden və medallarla təltif edilmiş şəxslərə, döyüş cəbhələrinin arxa hüdudları, yaxud döyüşən donanmaların əməliyyat zonaları daxilində ordunun və donanmanın mənafeyi üçün tapşırıqları yerinə yetirmiş xüsusi birləşmələrin işçilərinə, Leninqrad şəhərinin müdafiəsinə görə müvafiq medal və döş nişanı ilə təltif edilmiş şəxslərə, habelə Leninqrad şəhərinin mühasirəsi iştirakçılarına 500,0 (beş yüz) manat məbləğində birdəfəlik maddi yardım veriləcək.

Ödənişlər üçün Azərbaycan Prezidentinin Ehtiyat Fondundan 5,9 mln. manat (təxminən 3,4 mln. dollar) vəsait ayrılıb.

9 May Azərbaycanda qeyri-iş günüdür.

Ötən il 763 müharibə veteranı və 12 949 digər şəxs eyni ölçülərdə yardım almışdı.

1941-1945-ci illər Böyük Vətən Müharibəsi, demək olar ki, hər bir Azərbaycan ailəsinə toxunub, Bakı nefti isə faşizm üzərində hərbi qələbənin təmin edilməsində mühüm rol oynayıb.

BVM-də Azərbaycanın hər beş sakinindən biri iştirak edib. Əhali 3,4 mln. nəfər (1941-ci il) olduğu halda, 681 min nəfər (bunun 10 mindən çox qadınlardır) cəbhəyə gedib. Onlar müxtəlif millətlərin nümayəndələri olub. 250 min nəfər həlak olub.

400 mindən çox əsgər və zabit döyüş orden və medalı ilə təltif edilib, 14 nəfər tam Şöhrət Ordeni Kavaleri, 123 nəfər Sovet İttifaqı Qəhrəmanı olub, qərarların 44 nəfəri etnik azərbaycanlılardır. -06D-