"ABB işi üzrə" məhkəmə prosesində

Bakı/12.03.19/Turan: Martın 11-də Bakı Ağır Cinayətlər Məhkəməsində Faiq Qəniyevin sədrliyi ilə "Azərbaycan Beynəlxalq Bankı" (ABB) ASC-nin keçmiş sədri Cahangir Hacıyev, keçmiş deputat və biznesmen Dünyamin Xəlilov və ABB-nin vəsaitlərinin mənimsənilməsində ittiham olunan digər şəxslərin işi üzrə proses davam etdirilib.

İclasın əvvəlində vəkil Fəxrəddin Mehdiyev bildirib ki, həbs edilmiş bankirin bacısı Əminə Hacıyevanın qardaşı ilə telefon danışıqlarına və görüşlərinə icazə verilmir. Bununla əlaqədar o, 2 saylı Bakı İnzibati İqtisad Məhkəməsinə müraciət edib.

Amma məhkəmə iddianı təmin etməyib. Bakı Ağır Cinayətlər Məhkəməsində keçən məhkəmə iclasında vəkil Mehdiyev İnzibati İqtisad Məhkəməsinin "məsləhətinə" də istinad edərək, qohumlarla telefon danışıqlarına və görüşlərə icazə verilməsi barədə vəsatətlə müraciət edib. Amma məhkəmə bu məsələnin onun səlahiyyətlərinə aid olmamasına istinad edərək, vəsatəti təmin etməyib.

Daha sonra proses şahid ifadələri ilə davam edib, onlar ABB-də onların adına necə kredit götürüldüyü barədə danışıblar.

Həmçinin, bir neçə il əvvəl D.Xəlilovla birlikdə həbs edilmiş şəxslər şahid ifadəsi veriblər. Mənsur Zeynalov bildirib ki, D.Xəlilovun "Ceneral Konstrakşn" şirkətində hüquqşünas kimi işləyib. Amma hüquqşünas təhsili yoxdur: "Mən sadəcə olaraq sənədləri tərcümə edirdim. 2007-ci ildə Xəlilov "Kondor Qrup" firmasını təsis edib və məni direktor təyin edib. Daha sonra mənim adıma kreditlər götürülüb. Mən yalnız imza atmışam".

Adına 10 milyon manatdan çox kredit götürülən şahid Fərhad Əmiraslanov bildirib ki, "Ceneral Konstrakşn"da inşaat mütəxəssisi kimi işləyirdi. "Daha sonra Xəlilovun xahişi ilə "Avropa" MMC-nin rəhbəri oldum. Amma rəhbərlik formal idi. Mənim adıma bir neçə dəfə pul götürülüb".

Şahid Seyfulla Seyfullayev bildirib ki, onun adına 9 milyon manatlıq kredit rəsmiləşdirilib: "Amma mən pul görməmişəm. Mənə deyiblər ki, pul şirkətin inkişafına xərclənəcək. Armatur almalı idilər, amma almadılar".

Məhkəmədə həmçinin D.Xəlilovun fabrikində işləmiş aşbaz, xadimə, usta da ifadə verib. Onlar hamısı bildiriblər ki, onların adına çoxmilyonluq kreditlər götürülüb və onların bundan xəbəri olmayıb, baxmayaraq ki, sənədləri imzalayıblar. Onlara şəxsiyyət vəsiqələrini gətirməyi və banka getməyi əmr ediblər.

Növbəti iclas martın 18-də keçiriləcək. -21С-