2017-2018-ci illərdə Azərbaycan 615 milyon dollarlıq silah idxal edib

Bakı/11.03.19/Turan: Stokholm Dünya Problemlərinin Araşdırılması İnstitutunun (SIPRI) martın 11-də açıqladığı araşdırmaya görə, 2017-2018-ci illərdə Azərbaycan 615 mln. dollar məbləğində silah və hərbi sursat idxal edib. 2017 və 2018-ci illərə müvafiq olaraq 285 mln. və 330 mln. dollar düşüb.

Silahlar Belarus, Çexiya, İsrail, Pakistan, Rusiya, Slovakiya və Türkiyədən alınıb.

2018-ci ildə Azərbaycan Belarusdan 10 ədəd Polonez B-200BM yaylım atəşli reaktiv sistem alıb.

Çexiya 30 ədəd 122 mm.-lik RM-70 göndərib.

İsrail altı ədəd OPV-62 markalı keşikçi gəmisi, iki Saar-72 gəmisi, 100 ədəd Orbiter 1K bazalı zərbəçi pilotsuz uçan aparat, 250 ədəd Spike-NLOS raketi, 100 ədəd SandCat zirehli maşını, 100 ədəd Skystriker dron-kamikadze, iki Hermes-900 pilotsuz uçuş aparatı, 50 ədəd LORA raketi, 4 ədəd LORA reaktiv sistemi, 10 ədəd 120 mm.-lik Sandcat SPEAR zirehli maşını göndərib.

Pakistan 10 ədəd MFI-17 Supporter qırıcısı göndərib.

Rusiya 70 ədəd BTR-82A, 800 9M123/AT-15 zirehli transportyoru və 24 ədəd 9P157-2 "Xrizantema-С" tank əleyhinə raket verib.

Slovakiya 36 ədəd 152 mm.-lik DANA özüyeriyən artilleriya sistemi göndərib.

Türkiyə 5 ədəd SOM silah sistemi göndərib.

Naməlum ölkə tərəfindən iki ədəd Amerika istehsalı olan Bell 412 çoxməqsədli vertolyot göndərilib. -0-