Açıq havada maskadan istifadə ləğv olunur

Bakı/25.05.21/Turan:/Mayın 31-dən Azərbaycanda açıq havada maska taxılması ləğv olunur. Bu barədə Nazirlər Kabineti yanında Operativ Qərargahın bu gün keçirilən brifinqində Azərbaycan Prezidentinin köməkçisi, Prezident Administrasiyasının iqtisadi məsələlər və innovativ inkişaf siyasəti şöbəsinin müdiri Şahmar Mövsümov bildirib.

Şahmar Mövsümovun sözlərinə görə, mayın 31-dən Bakı metropoliteni fəaliyyətini bərpa edəcək. Şəhərlərarası və rayonlararası sərnişindaşıma fəaliyyəti də bərpa edilir.

Bundan əlavə, iyunun 10-dan “Mall” və iri ticarət mərkəzlərinin, idman sağlamlıq obyektlərinin, ibadət yerlərinin fəaliyyətinə icazə veriləcək. Həmçinin iyunun 10-dan çimərliklər fəaliyyət göstərəcək.

Prezident Administrasiyası rəsmisinin sözlərinə görə, Azərbaycanda COVİD pasportu tətbiq olunacaq.

Prezidentin köməkçisi bildirib ki, iki doza vurulanlara vaksin sertifikatı veriləcək: “İkinci sertifikat isə immunitet sertifikatıdır. Bu, xəstələnib sağalanlara veriləcək. Bu iki sertifikatın hər ikisi COVİD pasportu adlanacaq. Bunların hər hansı birinə malik olanlar idman sağlamlıq obyektlərinin xidmətindən istifadə edə biləcəklər. Gələcəkdə bu yanaşmanın toylara tətbiqi nəzərdə tutulur. Konsert, teatr və şənlik xidmətlərindən istifadə etmək istəyənlərə də COVİD pasportu tətbiq olunacaq”.

Öz növbəsində TƏBİB-in xəstəliklərin profilaktikası və nəzarəti şöbəsinin müdiri Yaqut Qarayeva brifinqdə bildirib ki, Azərbaycanda yoluxma sayı azalsa da, yenə də ölüm halları var.

Onun sözlərinə görə, aprel ayından sonra yoluxma 10 faizə qədər düşüb: "Hər zaman yoluxma sayına yox, yoluxma faizinə diqqət edirik. Son günlərdə yoluxma faizi 3 faizə qədər enib. Bu, bizim üçün ciddi göstəricidir. Ən çox yoluxmalar sosial aktiv yaş qruplarında olur”, - o bildirib.

Həftəsonları ictimai nəqliyyat üçün nəzərdə tutulan məhdudiyyətlərə gəldikdə isə 
Nazirlər Kabinetinin mətbuat katibi İbrahim Məmmədov bildirib ki,  bu məhdudiyyətlər yenə də qüvvədə olacaq.

Onun sözlərinə görə , şənbə və bazar günləri üçün avtobuslar işləməyəcək: “Mayın 31-dən sonra açılacaq metro da həftəsonları fəaliyyət göstərməyəcək. Yəni həm avtobus, həm də metro həftənin I-V günləri işləyəcək”.

2019-cu ilin sonlarında dünyada yeni koronavirus aşkar edilib. 2020-ci il martın 11-də Dünya Səhiyyə Təşkilatı koronavirusu pandemiya elan edib. Dünyada sürətlə yayılan bu virusdan indiyə qədər 3,4 milyondan çox adamın vəfat etdiyi açıqlanıb. Azərbaycanda isə ümumilikdə 332 min 610 nəfərin koronavirus infeksiyasına yoluxması faktı müəyyən edilib, onlardan 4 min 867-nin vəfat etdiyi bildirilir.

Ötən il martın 24-dən Azərbaycanda koronavirus pandemiyasi ilə bağlı karantindir. Bu müddətdə rejim gah sərtləşdirilib, gah da yumşaldılıb. Bakı metrosunun da fəaliyyəti oktyabrın 19 -dan dayandırılmışdı.

Bu il martın 18-dən ölkədə vaksinasiya başlayıb. Rəsmi məlumsatlara görə, iki milyona yaxın insan vaksinasiya olunub.-D16-