Bakı/17.11.19/Turan: Azərbaycan Demokratiya və Rifah (ADR) Hərəkatı piketi təxirə salıb və Bakı şəhəri İcra Hakimiyyətini məhkəməyə verir.
“ADR Hərəkatı Bakı şəhər İcra Hakimiyyətinin noyabrın 19-da Əmək və Əhalinin Sosial Müdafiəsi Nazirliyinin binası qarşısında uşaq pulunun bərpa olunması, pensiya yaşının aşağı salınması, təqaüd və müavinətlərin artırılması tələbləri ilə piket keçirilməsinə icazə verməməsini sərbəst toplaşmaq azadlığına müdaxilə sayır və bu müdaxilənin qanunsuz hesab edilməsi barədə qərar çıxarılması məqsədilə məhkəməyə müraciət edir, bununla əlaqədar olaraq planlaşdırdığı piketi təxirə salır,” hərəkatın məlumatında deyilir.
Bakı şəhəri İcra Hakimiyyətinin ADR Hərəkatına cavabında qeyd edilir ki, ərazidə piyadaların sıxlığı, nəqliyyatın intensivliyi nəzərə alınaraq, orada toplantının keçirilməsi ictimai asayişin təmin edilməsi baxımından çətinlik yaradacaqdır.
“Bu bəhanə ilə piket faktiki olaraq qadağan edilib. ADR Hərəkatı hesab edir ki, Bakı şəhər İcra Hakimiyyətinin qərarı vətəndaşların sərbəst toplaşmaq hüququna qanunsuz və kobud müdaxilədir. Belə ki, “Sərbəst toplaşmaq azadlığı haqqında” qanunun tələbinə görə yalnız fövqəladə və ya hərbi vəziyyətin qüvvədə olduğu müddət ərzində onun tətbiq edildiyi ərazidə yığıncaqların, mitinqlərin, nümayişlərin, küçə yürüşləri və piketlərin keçirilməsinə “Fövqəladə vəziyyət haqqında” və “Hərbi vəziyyət haqqında” qanunlara uyğun olaraq məhdudiyyət qoyula bilər və ya onların keçirilməsi qadağan edilə bilər. Beləliklə də, Bakı şəhər İcra Hakimiyyəti qanunvericilikdə təsbit olunmuş insan hüquq və azadlıqlarının, ilk növbədə sərbəst toplaşmaq azadlığının pozuntusuna yol verib, Konstitusiyanın sərbəst toplaşmaq azadlığını təsbit edən 49-cu maddəsini pozub,” ADR Hərəkatı bildirir.
Xatırladaq ki, Milli Şuranın yanvarın 19-da keçirdiyi mitinqdən sonra Bakı meriyası müxalifət partiyalarına mitinq keçirmək üçün razılıq verməyib.
Meriya müxalif siyasi partiyaların sonuncu müraciətlərinə Bakının mərkəzindən 20 kilometr uzaqda yerləşən Qaradağ rayonunun Lökbatan qəsəbəsində aksiya keçirməyi məsləhət bilib. Meriyanın bu təklifi qəbul edilməyib.
Bununla yanaşı, Milli Şura oktyabrın 19-da 28 May metro stansiyasının qarşısındakı meydanda razılaşdırılmamış mitinq, Müsavat Partiyası isə noyabrın 12-də Bakı meriyasının binası qarşısında razılaşdırlmamış piket keçirməyə cəhd edib. Hər iki cəhdin qarşısı polis tərəfindən alınıb, onlarla insan saxlanılıb.-0-
Cəmiyyət
-
Dekabrın 22-də Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağıntısız keçəcəyi gözlənilir. Lakin gecə və səhər bəzi yerlərdə çiskin olacağı ehtimalı var. Mülayim cənub-qərb küləyi əsəcək.
-
Çox vaxt "Qafqazın Dubayı" adlandırılan Bakı getdikcə sakinlərin mənzil hüquqlarının sistematik şəkildə pozulması ilə tanınmağa başlayır. Şəhərin yenilənməsi və yeni eleqant binaların inşası zamanı Azərbaycanın paytaxtında minlərlə ailə qanunsuz olaraq öz evlərindən məhrum edilib. Çoxları müqavimətin faydasız olduğunu bilərək, öz qiymətli əmlaklarına görə qeyri-adekvat pul kompensasiyasına razılaşır. Mənzil Məcəlləsinə inanan azlıq isə tikinti şirkətlərindən ədalətli təzminat tələb edir, ancaq çox vaxt hər şeyi itirir - həm evini, həm də təzminatın istənilən formasını.
-
Düşərgədə iştirak edən məktəblilər ölkəmizi üç nüfuzlu beynəlxalq olimpiadada təmsil edəcək Ölkəmizin beynəlxalq fənn olimpiadalarında təmsil etməyə hazırlaşan şagirdlərin hazırlıq prosesi müvəffəqiyyətlə davam edir. Azercell, Elm və Təhsil Nazirliyi və Təhsil İnstitutunun birgə əməkdaşlığı çərçivəsində Bakı Ali Neft Məktəbində bu məktəblilər üçün növbəti “İnformatika Düşərgəsi” təşkil olunub.
-
Ötən gecə Azərbaycan-Ermənistan sərhədində 4.8, 3 və 3.8 maqnitudalı zəlzələlər baş verib, Azərbaycan Milli Elmlər Akademiyası Respublika Seysmoloji Xidmət Mərkəzi bildirib.
Rəy yaz