Azərbaycan mətbuatı erməni jurnalistlərinin axtarışında

Bakı/18.11.19/Turan: Azərbaycanda mətbuat erməni jurnalistlərinin bu gün Bakıya planlaşdırılan səfəri haqqında məlumat axtarışındadır. Noyabrın 17-18-nə planlaşdırılan səfər haqqında heç bir məlumat yoxdur.

Hər iki tərəfdən dövlət qurumları susmağa davam edir.

Turan İnformasiya Agentliyinin direktoru Mehman Əliyev bu gün Ermənistanın Arka İnformasiya Agentliyinin direktoru Konstantin Petrosovla bu mövzuda telefonla söhbət edib.

Petrosovun da anons edilən səfər haqqında məlumatı yox idi. “Belə bir səfərin olub-olmadığı, ona kimin cəlb edildiyi haqqında məlumatımız yoxdur”, deyə o bildirib.

Səfərin erməni jurnalistlərin təhlükəsizliyi məqsədilə məxfilik şəraitində baş tuta biləcəyi istisna deyil.

Oktyabrın sonlarında RF xarici işlər naziri Sergey Lavrov bildirib ki, Yerevan və Bakının Dağlıq Qarabağ münaqişəsinin nizamlanması üzrə tədbirlər çərçivəsində jurnalistlərin qarşılıqlı səfərləri haqqında danışıqları ATƏT katibliyinin vasitəçiliyi ilə aparılır.

Sonradan qeyri-rəsmi mənbələr tərəfindən planlaşdırılan səfər haqqında məlumat yayılıb, amma hər iki ölkənin XİN-i tərəfindən nə təsdiq, nə də təkzib olunub. -0-