Ailəsi Fuad Qəhrəmanlının taleyindən narahatdır

Bakı/27.08.20/Turan: Həbsdə olan Azərbaycan Xalq Cəbhəsi Partiyasının (AXCP) Rəyasət Heyətinin üzvü Fuad Qəhrəmanlının ailəsi onun taleyindən narahatdır.

“Fuad Qəhrəmanlının taleyindən narahatlığımız hələ də qalmaqdadır. O iyulun 23-də həbs olunandan indiyədək cəmi bir dəfə evə zəng edib. Ondan sonra nə telefon əlaqəsi var, nə də ailə üzvləri ilə görüşünə icazə vermirlər”, deyə Qəhrəmanlının ailə üzvləri Turan-a bildiriblər.

Xatırladaq ki, Qəhrəmanlı 14-15 iyul “Qarabağ” aksiyası zamanı iğtişaşların təşkilində ittiham olunub.

Ona qarşı CM-in 4 maddəsi: 278-ci (hakimiyyəti zorla ələ keçirmə və ya onu zorla saxlamağa yönəlik hərəkətlər), 186-cı (əmlakı qəsdən məhvetmə və ya zədələmə), 233-cü (ictimai qaydanın pozulmasına səbəb olan hərəkətlər təşkil etmə ) və 315-ci (hakimiyyət nümayəndəsinə zor tətbiq etmə) maddələri ilə ittiham irəli sürülüb.

Amma Qəhrəmanlı aksiyada iştirak etməyib və onun təşkili ilə heç bir əlaqəsi olmayıb.

1 saylı Bakı İstintaq Təcridxanasında o, amansız işgəncələrə məruz qalıb, bu barədə qeyri-rəsmi mənbələr məlumat veriblər.

Hazırda İstintaq Təcridxanasının rəhbərliyi Fuad Qəhrəmanlıya sovqat, paltar və kitab qəbul edir. Amma çirkli paltarları və daha əvvəl yemək aparılan qabları geri qaytarmırlar.

“Fuad iyulun 23-də həbs edilib, o zamandan nə qədər kirli paltar və qab-qacaq yığılıb. Fuad bunları nə üçün qaytarmır, bu qədər palrtarı, qab-qacağı harada saxlayır, nə üçün saxlayır, sirr olaraq qalır. Hər dəfə deyirlər Fuad qab-qacağı və kirli paltarlarını qaytarmadı”, deyə ailə üzvü bildirib.

Xatırladaq ki, bundan əvvəl Qəhrəmanlı öz vəkilindən imtina etməyə məcbur edilib, bu da yaxınlarının onun bunu işgəncələr və qohumlarına təzyiq nəticəsində etmək məcburiyyətində olduğunu düşünməsi üçün əsas verib.

Penitensiar Xidmətdən şərh almaq mümkün olmayıb.

Qəhrəmanlı dəfələrlə uzunmüddətli həbsə məhkum edilib. Sonuncu dəfə o, 2015-i ildə Nardaranda iğtişaşların təşkili ittihamı ilə 12 il müddətinə azadlıqdan məhrum edilib. “Beynəlxalq Amnistiya” onu vicdan məhbusu kimi tanıyıb.

2019-cu ilin martında Qəhrəmanlı əvf edilib. -03B06-