Ali Məhkəmə NİDA fəallarının şikayətlərini təmin etməyib

Bu gün Ali Məhkəmədə Fərhad Kərimovun sədrliyi ilə həbsdə olan üç NİDA fəalı – Üzeyir Məmmədli, Şahin Novruzlu və Rəşad Həsənovun kassasiya şikayətinə baxılıb.

Məhkəmə hər üç fəalın şikayətini təmin etməyib, bu barədə Turan-a vəkil Nemət Kərimli bildirib. Onun sözlərinə görə, müdafiə tərəfi qərarla razı deyil və Avropa İnsan Hüquqları Məhkəməsinə şikayət verəcək.

Daha dörd fəalın – Məmməd Əzizov, Zaur Qurbanlı, Rəşadət Axundov, İlkin Rüstəmzadənin kassasiya şikayətlərinə bir müddət sonra baxılacaq, bu barədə digər vəkil Əsabəli Mustafayev bildirib.

Səkkiz NİDA fəalı – Bəxtiyar Quliyev, Şahin Novruzlu, Məmməd Əzizov, Zaur Qurbanlı, Rəşad Həsənov, Üzeyir Məmmədli, Rəşadət Axundov və İlkin Rüstəmzadə 2013-cü ilin mart-aprel aylarında Bakıda etiraz aksiyası zamanı kütləvi iğtişaşlar hazırlamaq ittihamı ilə həbs ediliblər. 6 may 2014-cü ildə fəallar 6 ildən 8 ilədək həbs cəzası alıblar.

Quliyev və Novruzlu 2014-cü il oktyabrın 17-də, Qurbanlı və Məmmədli isə dekabrın 29-da dövlət başçısı tərəfindən əvf olunub.

Dörd fəal – Əzizov, Axundov, Həsənov və Rüstəmzadə hələ də həbsdədir. Həbs edilmiş bütün NİDA fəalları Amnesty İnternational tərəfindən “vicdan məhbusu” kimi tanınıb. -06В-