Almanlar Bakıdakı yüksək mərtəbəli binaların seysmik davamlılığını yoxlayacaqlar

Avqustun 1-də zəlzələ zamanı İmişli rayonunda baş vermiş zəlzələdən dəyən ziyanın ciddi olacağı gözlənilmir, belə ki, təkanların episentri böyük dərinlikdə olub. "Köhnə tikililərdə çatların əmələ gəlməsi ehtimalı var", deyə çərşənbə axşamı keçirilən mətbuat konfransında Milli Elmlər Akademiyası nəzdində Respublika Seysmoloji Xidmət Mərkəzinin baş direktoru Qurban Yetirmişli bildirib.

Onun sözlərinə görə, yerli vaxtla 08:46-da Beyləqandan 34 kilometr şimal-şərqdə baş vermiş birinci zəlzələnin maqnitudası 5,6 bal təşkil edib. Yaxınlıqdakı şəhərlərdə, habelə şimal və şimal-qərb rayonlarında 5,0 bal gücündə yeraltı təkanlar hiss olunub. Üç dəqiqə sonra 3,9 bal gücündə ikinci zəlzələ baş verib. Yerli vaxtla 11:51-də baş vermiş üçüncü zəlzələnin maqnitudası 4,1 bal təşkil edib. Birinci yeraltı təkandan sonra 6 afterşok qeydə alınıb. Gün ərzində zəif afterşoklar davam edib, deyə o bildirib. Seysmoloqun fikrincə, yerli əhalinin təşvişinə heç bir əsas yoxdur.

 Paytaxtda binaların seysmik cəhətdən davamlılığına toxunan seysmoloq deyib ki, Bakıda bütün yüksək mərtəbəli binaların seysmik davamlılığı yoxlanılacaq. Bu, Almaniyanın geoloji təşkilatı ilə birgə layihə çərçivəsində iki il ərzində həyata keçiriləcək. Layihənin həyata keçirilməsi bu ilin payızında başlaya bilər.

Yetirmişli binaların yoxlanılması zərurətinin nə ilə bağlı olduğunu açıqlamayıb. Onun sözlərinə görə, Seysmoloji Xidmət Mərkəzi əvvəlcədən yaşayış və sənaye təyinatlı yüksək binaların tikildiyi ərazinin seysmik olub-olmaması haqqında rəy verir. Eyni zamanda, FHN tikinti prosesinə nəzarət edir. Bakıda tikilən bütün binaların 9 ballıq zəlzələyə davamlılığı nəzərdə tutulub, deyə o bildirib. -02D-