Alpinistin xəstəliyi ilə əlaqədar Şişapanqmanı fəth etmək mümkün olmayıb

Alpinizm Federasiyasının prezidenti İsrafil Aşurlunun xəstəliyi ilə əlaqədar iki Azərbaycan alpinisti Tibetdə (Çin) 8 min metrlik Şişapanqma (Qosaintan) zirvəsinin fəthini dayandırmalı olub.

Federasiyanın mətbuat xidmətinin məlumatına görə, mayın 1-də Aşurlu və onun komanda yoldaşı Firuz Dadaşov ABŞ və İranlı iki digər alpinistlə birlikdə zirvənin fəthinə çıxıblar.

Bir gün ərzində idmançılar baza düşərgəsindən birdən-birə 1200 metr yüksəklikdəki ikinci düşərgəyə çıxıblar. Lakin növbəti gün İsrafil Aşurlunun səhhəti kəskin şəkildə pisləşib və alpinistlər fəthi dayandırmaq məcburiyyətində qalıblar.

Tezliklə aydın olub ki, Aşurlunun yüksək temperaturu var, ağ ciyərlərində şişmə əlamətləri yaranmağa başlayıb.

Faciənin qarşısını almaq üçün təcili eniş qərara alınıb. Xəstəliklə əlaqədar baza düşərgəsinə gedən yol iki gün vaxt alıb.

Baza düşərgəsinin yüksəkliyi – 5700 m də Aşurlu üçün təhlükəli idi, o, süni oksigenlə nəfəs almalı olub. Vəziyyətinin normallaşması üçün yüksəkliyin azaldılması tələb olunurdu. Beləliklə, 8027 m yüksəklikdəki zirvəyə ekspedisiya dayandırılıb və mayın 4-də alpinistlər Nepalla həmsərhəd olan Canq Mu şəhərinə (1600 m) qədər eniblər. Yaxın günlərdə idmançılar evə qayıdacaqlar.

Bu, Azərbaycan alpinistləri üçün ikinci çətin mövsümdür. Belə ki, ötən il Azərbaycan nümayəndələri Pakistanda ən şimalda yerləşən Nanqaparbat (8053 m) zirvəsinin fəthi zamanı az qala terror hücumundan ziyan çəkəcəkdi. Həmin vaxt taliblər baza düşərgəsində 10 ekspedisiya üzvünü güllələyib. Bu zaman idmançıların bir hissəsi, o cümlədən Azərbaycan nümayəndələri 6500 m yüksəklikdəki baza düşərgəsindən yuxarıda idilər. -02В-