ANAMA münaqişə zonasında 796 partlamamış hərbi sursat aşkarlayıb

Bakı/07.01.21/Turan: Bu il yanavrın 1-dən 5-dək 796 ədəd partlamamış hərbi sursat (PHS), 2 ədəd bombacıq, 8 ədəd piyada əleyhinə mina, 87 ədəd tank əleyhinə mina, 3 ədəd tank əleyhinə minanın partladıcısı və 19 ədəd partlamış mərmi qalıqları aşkar olunub. Bu barədə Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAM) məlumat yayıb. 

Agentlik bildirir ki, partlayış qrupu tərəfindən 491 ədəd mina və partlamamış hərbi sursat (PHS) zərərsizləşdirilib.

Agentlik həmçinin yanvarın 7-də Ağcabədi rayonu ərazisindən 1 ədəd RQD-5 əl qumbarası və Ağstafa rayonu ərazisindən 6 ədəd aviobomba (P-50) aşkar edib.

Ümumilikdə, Agentlik tərəfindən 27 sentyabr 2020-ci – 05 yanvar tarixlərində münaqişə zonasında 2 415 ədəd partlamamış hərbi sursat (PHS), 4 554 ədəd piyada əleyhinə mina, 1 517 ədəd tank əleyhinə mina, 1 915 ədəd tank əleyhinə mina partladıcısı, 77 ədəd detonator, 1 439 ədəd 9N235 bombacığı, 20 988 ədəd müxtəlif çaplı patronlar, 2 ədəd qaz qumbarası, 5 968 qram qara barıt, 275 kq. plastik partlayıcı maddə, 150 kq. amonium-nitrat tərkibli partlayıcı maddə, 27 ədəd hərbi məqsədlər üçün istifadə olunan meteoroloji radiopelenqator, 7 ədəd dron (zərərsizləşdirilib), 2 ədəd raketin mikrosxemi və 1 957 ədəd partlamış raket hissələri aşkar edilib.

Sentyabrın 27-dən noyabrın 10-dək Dağlıq Qarabağda hərbi əməliyyatlar yenidən bərpa olunub və bu otuz ildən çox davam edən münaqişənin davamı olub.

Noyabrın 10-da əldə edilən Azərbaycan, Ermənistan və Rusiya razılaşması hərbi əməliyyatların dayandırılmasına səbəb olub. Razılaşmaya əsasən bölgəyə Rusiya sülhməramlıları yerləşdirilib.

Ekspertlər münaqişə zonasında yüz minədək minanın basdırıldığını güman edirlər. Onlar minaların ən çox Tərtər, Ağdam və Füzuli rayonlarının ərazisində olduğunu düşünürlər.

Hazırda münaqişə zonasının ermənilər yaşayan hissəsində Rusiya Silahlı Qüvvələrinin minatəmizləyənləri, Azərbaycan ordusunun nəzarətində olan hissədə Azərbaycan Respublikası Ərazilərinin Minalardan Təmizlənməsi üzrə Milli Agentliyinin (ANAMA), Azərbaycan Müdafiə Nazirliyinin və Türkiyə Milli Müdafiə Nazirliyinin minatəmizləyənləri çirklənmiş sahələrin təmizlənməsi işlərini həyata keçirirlər.

Rusiya Müdafiə Nazirliyi bildirir ki, bu nazirliyin Beynəlxalq Ərazilərinin Minalardan Təmizlənməsi Mərkəzinin mütəxəssisləri Dağlıq Qarabağ ərazisinin minalardan təmizlənməsi üzrə işləri davam etdirirlər.

"23 noyabr 2020-ci il tarixindən indiyədək Rusiya sülhməramlı qüvvələrinin mühəndis bölmələri təxminən 427 hektar ərazini, 160,8 kilometr yolu, 167 tikilini , o cümlədən 22 sosial əhəmiyyətli obyekt daxil olmaqla 617 yaşayış binanı partlamamış hərbi sursatlardan təmizləyiblər, 19,6 min partlayıcı obyekti zərərsizləşdirib", - məlumatda deyilir. -03-