ANS öz əmlakını binadan çıxarmır

Bakı/14.06.17/Turan: "ANS televiziyası hələ də Azərbaycan Milli Elmlər Akademiyası Zoologiya İnstitutunun binasındakı əmlakını çıxarmayıb. Prokurorluqdan deyiblər ki, bir yer tapın əşyaları ora köçürək. İndi yer axtarırıq", - Azərbaycan Milli Elmlər Akademiyası Zoologiya İnstitutunun direktoru Elman Yusifov Turan-a bildirib.

Onun sözlərinə görə, ANS Zoologiya İnstitutunun yerləşdiyi binada 3000 kvadrat metr qeyri-yaşayış sahəsini boşaltmır. Belə ki, ANS-in Dövlət Əmlak Komitəsi ilə bağladığı icarə müqaviləsi 2016-cı il oktyabrın 1-dən qüvvədən düşüb. Bu sahənin 1000 kvadratmetrinin qapıları (binanın birinci mərtəbəsi) istintaq orqanı tərəfindən möhürlənib və polis nəzarətindədir. Qalan 2000 kvadrat metr ərazidən isə ANS əmlakını çıxarmır.

Azərbaycan Milli Televiziya və Radio Şurası (MTRŞ) Türkiyədə 2016-cı il 15 iyul hadisələrindən sonra ANS televiziyasının efirində Fətullah Gülənin müdafiəsinə yönələn, terrora çağırış xarakterli materialların yayımlandığını iddia edərək 18 iyul 2016-cı ildən etibarən bu kanalın yayımını dayandırıb. Şura daha sonra ANS-ə 25 oktyabr 2013-cü ildə verilmiş lisenziyanın ləğvi üçün məhkəməyə müraciət edib. Məhkəmə iddianı təmin edib. Ali Məhkəmə bu qərarı qüvvədə saxlayıb. ANS rəhbərliyinin həmin qərardan Avropa Məhkəməsinə şikayət etdiyi bildirilir.

ANS Milli Teleradio Şurasının iddialarını qəbul etmir və terrora çağırış xarakterli verilişlər yaymadığını bildirir.

Telekanal rəhbərliyi bir neçə dəfə dövlət başçısına müraciət edərək dəstək göstərməsini xahiş edib. Cavab almayan ANS rəhbərləri 2003-ci ildə dünyasını dəyişmiş keçmiş prezident Heydər Əliyevə məktub yazmaqdan başqa çıxış yolu tapmayıblar.

Ancaq məktub müəlliflərinin ideyası əks effekt verdi, çünki bu, indiki prezidentə inamsızlıq kimi görünüb.-03B-